«Համագործակցություն հանուն ժողովրդավարության» հասարակական կազմակերպության ղեկավար Ստեփան Դանիելյանը, «Առաջին լրատվական»-ի խնդրանքով անդրադառնալով Երևանի քաղաքապետարանում ռուսերենի դասընթացներ կազմակերպելու Երևանի քաղաքապետի նախաձեռնությանը, ասաց, որ այդ ամենը տրամաբանական է այսօրվա քաղաքականության տեսանկյունից:
«Կատարվում է այն, ինչ որ պետք է կատարվեր: Ամենավատ կասկածներն անգամ իրականանում են: «Լեզվի մասին» ՀՀ օրենքի փոփոխությունների քննարկման ժամանակ այն կարծիքն էր հայտնվում, որ շեշտը պետք է դրվի Հայաստանում ռուսական դպրոցներ բացելու վրա: Նույնիսկ կարծիքներ էին հնչում, որ ռուսերենը պետք է դառնա երկրորդ պետական լեզու: Եթե պետական կառավարման օղակներից մեկում` Երևանի քաղաքապետարանում, անցկացվում են ռուսերենի դասընթացներ, ապա հաջորդ քայլը կլինի հայերենին զուգահեռ ռուսերեն պաշտոնական գրագրությունը, հետո` քաղաքի ցուցանակները կդարձնեն երկլեզու, այնուհետև կառավարությունում գրագրությունը կդարձնեն երկլեզու»,- ասաց մեր զրուցակիցը:
Նա մտավախություն հայտնեց, որ քիչ-քիչ կձևավորվի ռուսերենին տիրապետող մի խավ, որը կդառնա այդ մշակույթի կրողը: Ստեփան Դանիելյանն ամենավտանգավորը համարում է այն, որ մեր քաղաքացիների մի ստվար հատված հայ մշակույթը ասոցացնում է հայկական հեռուստաընկերությունների և այն ամենի հետ, ինչը քարոզվում է այդ հեռուստաընկերություններով: Ըստ նրա` մարդիկ այդ իրականությունից խուսափելու մղումով էլ ստիպված կձգտեն «ավելի բարձր» մշակույթի` ռուսական մշակույթին: «Եվ դրա համար սոցիալական և մշակութային բոլոր հիմքերը գցված են»,- կարծում է Ստեփան Դանիելյանը:
