Հայաստանում Ռուսաստանի դեսպանատան խորհրդական Վիկտոր Կրիվոպուսկովի ներկայությամբ մեկնարկել են քաղաքապետարանի աշխատակիցների համար ռուսերենի դասընթացները: Ռուսերենի դասընթացները ֆինանսավորում է «Ռուսսոտրուդնիչեստվո» գործակալությունը, որի հայաստանյան գրասենյակի ղեկավարն է Վիկտոր Կրիվոպուսկովը: Նա հայտարարել է, որ Հայաստանում ռուսաց լեզուն օտար չէ:
Նախկին քաղբանտարկյալ , Ազգային միացյալ նախաձեռնության համակարգող Շանթ Հարությունյանը «Առաջին լրատվական»-ի հետ զրույցում նշեց, որ Հայաստանը երեք հարյուր տարի եղել է ռուսական գաղութ և այսօր էլ մնում է գաղութի կարգավիճակում. «Իսկ գաղութում խոսում են մետրոպոլիայի լեզվով: Հռոմեական կայսրության լեզուն եղել է լատիներենը: Ռուսաստանի կայսրության լեզուն էլ ռուսերենն է»: Նրա դիտարկմամբ, ցանկացած կայսրություն ժամանակ առ ժամանակ իրականացնում է բարեփոխումներ: Իսկ Երևանի քաղաքապետարանի որոշումը, ըստ Շանթ Հարությունյանի, իր համար նորություն չէ: «Այդ քաղաքական քայլերը, որոնք պարտադրում է Ռուսաստանը Հայաստանին` որպես իր գաղութի, կշարունակվեն այնքան ժամանակ, մինչև հայ ժողովուրդը չապստամբի և չթոթափի ռուսական կայսրության լուծը: Այնպես, ինչպես դա տեղի ունեցավ Վրաստանում»,- ասաց Շանթ Հարությունյանը: