Տիգրան Կարապետյանի նախընտրական շաբաթն անցել է հանդիպումներ անցկացնելով: Այս մասին «Առաջին լրատվական»-ի հետ զրույցում տեղեկացրեց թիվ 17 ընտրատարածքում առաջադրված թեկնածու, ԺԿ ղեկավար Տիգրան Կարապետյանը`խոսելով իր նախընտրական քարոզչության շուրջ:
Նա նշեց, որ ընտրատարածքում ունենում է հանդիպումներ ժողովրդի հետ: «Բոլոր գյուղերում ունենում եմ հանդիպումներ: Ոչ մի բուկլետ չունեմ, չեմ ունենալու, զրույցներ ենք տանում մարդկանց հետ, իրականացնում մեր ծրագրերի և գաղափարների քարոզչական, բացատրական աշխատանք: Ունեմ շտաբներ, որոնք զբաղվում են ցուցակների զննությամբ, ամեն ինչն էլ փորձում ենք վերահսկել: Մեր ընտրատարածքում մինչ այս պահը եղել են հավասար պայմաններ բոլոր թեկնածուների համար իրենց քարոզչությունն անցկացնելու առումով»,- նշեց Տ. Կարապետյանը` տեղեկացնելով, որ իրենց նախընտրական կարգախոսն է՝ «Ընտրիր, թե չէ կպարտվես»:
Հիշեցնենք, որ թիվ 17 ընտրատարածքում առաջադրված են նաև ՀՀԿ թեկնածու Հենրիկ Աբրահամյանը, ՀՅԴ թեկնածու Մանվել Հայրապետյանը, ՀԱԿ թեկնածու Գագիկ Ներսիսյանը և ՀՀԿ թեկնածու Կարինե Պողոսյանը: