Ֆրանսիայի գործող նախագահ Նիկոլա Սարկոզին և նրա հիմնական մրցակից Ֆրանսուա Օլանդը հարյուր հազարավոր մարդկանց են դուրս բերել Ֆրանսիայի մայրաքաղաքի փողոցներ` իրենց նախընտրական հանրահավաքներին: Այս մասին հաղորդում է France Presse գործակալությունը:
Իր ելույթի ժամանակ Սարկոզին ասել է, որ տնտեսական ճգնաժամի պայմաններում միայն ինքը կարող է երաշխավորել Ֆրանսիայի կայունությունը: Նա խոստացել է սահմանափակել անօրինական էժան աշխատուժի ներհոսքը երկիր և փակել սահմանները, եթե այդ հոսքը մեծանա:
Նրա հիմնական մրցակից Օլանդն ասել է, որ «նա, ով փորձում է մոլորեցնել մեզ և սպառնում է երկրին աղետներով և վայրիվերումներով, հիմա էլ պնդում է, թե մեր հաղթանակի արդյունքում կփլուզվեն ֆինանսական շուկաները»:
«Նա հիմարություններ է ասում: Քանի որ շուկաներն այս ամենի հետ կապ չունեն, սակայն ինքը (Սարկոզին-խմբ.) ցանկանում է արթնացնել նրանց: Սարկոզիին դա չի հաջողվի, քանի որ ամեն ինչ որոշում է Ֆրանսիայի ժողովուրդը, որն ազատ է և ինքնիշխան: Իսկ վախի մթնոլորտ ստեղծելը հրաժարական տված պաշտոնյայի մարտավարություն է»,- ասել է Օլանդը:
Տեղեկացնենք, որ Ֆրանսիայի նախագահական ընտրությունները կկայանան մեկ շաբաթից:
