Ճարպակալությամբ տառապող բնակիչների թվով Քաթարն առաջատարն է ամբողջ աշխարհում: Այս հիվանդությամբ տառապում է երկրի բնակչության կեսը:
Ասիայի հարավ-արևմուտքում գտնվող այս երկիրը համարվում է ամենահարուստ պետություններից մեկը՝ շնորհիվ նավթի և գազի բնական պաշարների: Ամերիկյան Forbes ամսագրի կազմած վարկանիշային աղյուսակի համաձայն՝ անցած տարվա տվյալներով՝ Քաթարն առաջինն է բնակչության մեկ շնչին ընկնող միջին եկամուտի ցուցանիշով:
Պարբերականի տվյալներով` Քաթարում 1,7 մլն մարդուց միայն 250 հազարն է հանդիսանում տեղաբնիկ, որոնք միայն երկու սերունդ առաջ են ցեղային կենսակերպից անցել քաղաքակիրթ կյանքի: Բացի այդ, Քաթարում մեծ ճանաչում են ստացել արագ սննդի ռեստորանները, ինչպիսին են օրինակ՝ McDonald’s-ը և KFC-ն: Ճարպակալման հետ մեկտեղ աճել է շաքարախտով հիվանդների թիվը, որը կազմում է բնակչության 17 %–ը:
«Այս ամենն այն պատճառով է, որ մենք նստում ենք, ծխում ենք և ծանր սնունդ ենք ուտում արագ սննդի ռեստորաններում: Աշխատանք շատ չկա անելու, ամեն ինչ ավտոմատացված է, և մենք մեծ մասամբ ավտոմեքենաներում ու գրասենյակներում ենք անցկացնում մեր ժամանակը»,- ասում է տեղացի Հասան Թաիզան:
«Քաթարի ապագան լուրջ վտանգի առաջ է կանգնած»,- գտնում է Քաթարյան առողջապահության ասոցիացիայի շաքարախտի բուժման ծրագրի մենեջեր Շարուդ Ալ-Ջուդի Մատիչը:
Քաթարի իշխանություններն արդեն ազգաբնակչությանը բուժելու փորձեր են անում, մասնավորապես, գոյություն ունեն մի շարք պետական ընկերություններ, որոնք կոչ են անում բնակիչներին ճիշտ սնվել և ակտիվ կյանք վարել:
