Արտասահմանյան գիտնականները մեկնաբանել են, այսպես ասած, 13-րդ օրվա ուրբաթի ֆենոմենը: Ըստ տարածված վարկածի՝ այդ օրերին պետք է զգուշ լինել:
Կորնելի համալսարանի հոգեբանության ամբիոնի ղեկավար Թոմաս Ջիլովիչը գտնում է, որ մարդիկ վախենում են ամսի 13-ի ուրբաթից, որովհետև սովոր են այն նույնացնել վատ իրադարձությունների հետ:
«Մեր բանականությունը նմանականացման համակարգ է, և եթե ինչ-որ վատ բան պատահի ձեզ հետ հենց այդ ուրբաթներից մեկի ժամանակ, ապա այդ փաստը անբաժան կապված կլինի ձեր գիտակցության հետ»,- բացատրել է գիտնականը:
Նշենք, որ 17-21 մլն մարդ տառապում է «սև» ուրբաթ հասկացությունից: Բժշկության մեջ այս երևույթը համարում են ֆոբիաներից մեկը և երբեմն անվանում են պարասկավեդեկատրիաֆոբիա:
Հոգեբանական գիտությունների պրոֆեսոր Դեյվիդ Վեգները մի քանի տարի ուսումնասիրել է մարդու կարողությունը պատճառահետևանքային կապ տեսնել այնտեղ, որտեղ այն չկա: Նրա կարծիքով՝ մարդկանց մտքերն արտահայտվում են համապատասխան գործողությունների միջոցով, սակայն մտքերը ևս կարող են ինչպես դրական, այնպես էլ բացասական տարբեր իրադարձությունների պատճառ դառնալ:
«Մեզ կարող է թվալ, թե մենք անընդհատ մեզ ենք ձգում դժբախտություններ, բայց իրականում մենք հաճախ ենք մտածում դրանց մասին, ինչից հետո դրանք իրականում պատահում են մեզ հետ»,- ընդգծում է գիտնականը:
Այս կերպ Վեգները բացահայտել է, որ նրանք, ովքեր իրոք վախենում են ամսի 13-ի ուրբաթից, հենց այդ օրը կարող են մեծ դժբախտության ենթարկվել:
