Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին Սուրբ Զատիկի կապակցությամբ համաներել է 200 բանտարկյալի: Այս մասին այսօր տեղի ունեցած ճեպազրույցի ժամանակ հայտարարել է Վրաստանի պատիժների իրականացման և իրավական օգնության նախարար Խաթունա Կալմախելիձեն:
Վերջինս հավելել է, որ համաներման տակ ընկածների մեծ մասը Զատկի օրը (ապրիլի 15) կլքեն կալանավայրերը և Զատիկը կնշեն իրենց տներում: Նշվում է, որ ավելի վաղ նախագահին կից Համաներման հանձնաժողովը խորհուրդ էր տվել համաներել 170 բանտարկյալի, իսկ ևս 30-ի համար կրկնակի կրճատել պատժաժամկետը:
Համաներվածների թվում հայտնվել են նաև կանայք, սակայն նույնը չի կարելի ասել անչափահասների պարագայում, քանի որ նրանք դատապարտվել են ծանր հանցագործություններ կատարելու համար:
Հիշեցնենք, որ մոտ 10 օր առաջ համաներման խնդրանքով Վրաստանի նախագահ Միխեիլ Սաակաշվիլիին դիմել էին 416 բանտարկյալներ, որոնցից 76-ը կանայք էին, իսկ 9-ը՝ անչափահասներ:
