iDitord.org կայքում քաղաքացիները շարունակում են ահազանգել ընտրացուցակներում անճշտությունների, բարեգործության`կաշառք և արտոնություններ, քարոզչության կանոնների խախտման դեպքերի վերաբերյալ: Վերջին գրառումներից մեկը ՕԵԿ-ի բարեգործության մասին է:
Ըստ գրառման` ՕԵԿ ղեկավար Արթուր Բաղդասարյանն առավել հարմար է գտել կանանց գլխաշոր նվիրելու գաղափարը: «Մարտի 8-ից մինչ օրս դեռ շարունակվում են նրա «առաքյալների» այցելությունները բնակարաններ` հասցեատերերին իրենց հասանելիք նվերը մատուցելու նպատակով: Տոնական տոպրակում զետեղված են գլխաշոր, մարտի 8-ի շնորհավորական բացիկ Արթուր Բաղդասարյանի անունից և «Օրինաց երկիր» կուսակցության հեղինակած օրենքների շնորհիվ արձանագրված դրական փոփոխությունները:
ՕԵԿ-ի «պատվիրակները» շարժվում են հատուկ ցուցակով: Ուշադրության են արժանացել միայն այն կանայք, ովքեր այս կուսակցության հետևորդներն են կամ էլ ժամանակին (թեկուզ տարիներ առաջ) գրանցվել են այդտեղ: Հատկանշական է, որ ՕԵԿ-ի սեղմ ուղերձում կարևորվել են միայն կանանց խնդիրների լուծմանն ուղղված գաղափարները»,- ահազանգում է քաղաքացին:
Հիշեցնենք, որ ավելի վաղ «Առաջին լրատվական»-ի թղթակիցը Վանաձորից տեղեկացրել էր, որ ՕԵԿ-ի կողմից կանանց նվիրում են գլխաշորեր և վզնոցներ: