ՀԱԿ-ը ոչինչ չի անում ԲՀԿ-ի ռեյտինգը բարձրացնելու ուղղությամբ, այսօր «Առաջին լրատվական»-ի հետ զրույցում նման տեսակետ հայտնեց ՍԴՀԿ ատենապետ Լյուդմիլա Սարգսյանը: Հարցին, թե ՀԱԿ առաջնորդի կողմից հնչեցված կոչը՝ չընտրել ՀՀԿ-ին և ՕԵԿ-ին, չի՞ բարձրացնում ԲՀԿ-ի ռեյտինգը, Լ. Սարգսյանը պատասխանեց՝ ո՛չ:
Ըստ նրա` այս պահին եթե ԲՀԿ-ն պատրաստ է ՀԱԿ-ի հետ համատեղ վերահսկել գալիք խորհրդարանական ընտրությունները, ուրեմն դա քայլ առաջ է ԲՀԿ-ի կողմից: «Հիմնական պատասխանատուն այս երկրի ձախողումների, ծանրագույն սոցիալական վիճակի, տնտեսության փլուզման համար Հանրապետական կուսակցությունն է, իսկ «Օրինաց երկրին» ես կուսակցություն չեմ համարում, դա կցորդ է Հանրապետականին»,- մեկնաբանեց Լյուդմիլա Սարգսյանը` հավելելով, որ ԲՀԿ-ն շարունակում է մնալ իշխանական կոալիցիայի անդամ և ՀԱԿ-ի համար ևս նա շարունակում է մնալ իշխանության մաս:
Նրա համոզմամբ` պետք է հասկանալ, որ կա ընդդիմություն, և կա իշխանության մի հատված, որը պատրաստ է արդար, թափանցիկ ընտրությունների ապահովմանը ընդառաջ գնալ ՀԱԿ-ի հետ համատեղ, և դրանում ոչ մի արտառոց բան չկա:
«Այս դեպքում, եթե իշխանության մի մասը պատրաստ է ընտրությունների գնալ ավելի մաքրված և վերահսկողություն անցկացնելու պատրաստակամությամբ, ուրեմն մեր թիրախը շարունակում է մնալ Հանրապետականը»,- ամփոփեց իր խոսքը ՍԴՀԿ ատենապետը: