Գերմանիայում տարածաշրջանային ուղևորատար գնացքը բախվել է շինարարարկան լոկոմոտիվին, որի հետևանքով զոհվել է 3, վիրավորվել՝ 13 մարդ: Այս մասին հաղորդում է ITAR-TASS-ը՝ վկայակոչելով Կոբլենցի ոստիկանության դաշնային վարչության ներկայացուցչին:
Դեպքը տեղի է ունեցել այս գիշեր Օֆենբախի շրջանի Մայնի Մյուլհայմ քաղաքից ոչ հեռու: Մայնի Ֆրանկֆուրտից 35 ուղևոր տեղափոխող տարածաշրջանային գնացքը շարժվում էր դեպի Հանաու քաղաք: Բախման հետևանքով այն դուրս է եկել ռելսերից:
Ոստիկանության ներկայացուցիչը նշել է, որ շինարարական լոկոմոտիվը գտնվում էր նույն ճանապարհին, որի վրա ուղևորատարն էր: Այս պահին փորձում են ճշտել, թե ինչպես է այն հայտնվել այդտեղ:
Վիրավորները տեղափոխվել են մոտակա հիվանդանոց, նրանցից 6-ի վիճակը ծանր է: Այս պահին դեպքի վայրում աշխատում են ոստիկանները, հրշեջ ծառայությունները և փրկարարները:
