Այսօր ՀՀ ոստիկանության նախաձեռնությամբ և Հայաստանում ԵԱՀԿ երևանյան գրասենյակի ու ԵՄ աջակցությամբ տեղի ունեցավ կլոր սեղան-քննարկում՝ նվիրված ընտրական գործընթացին: Հանդիպմանը բացման խոսքով հանդես եկավ ՀՀ ոստիկանապետ Վլադիմիր Գասպարյանը: Նա նշեց, որ ՀՀ ոստիկանությունը իր իրավասության շրջանակներում արդյունավետ կերպով կկատարի ազատ, արդար և ժողովրդավար ընտրությունների իր բաժին գործառույթը:
«Ես ՀՀ բոլոր քաղաքացիներին ցանկացած խախտում արձանագրելու դեպքում կոչ եմ անում դիմել ոստիկանություն: Այդ նպատակով ստեղծվել է հատուկ օպերատիվ շտաբ, որը կառավարելու է ընթացքը: Գործելու է նաև թեժ գիծ, որպեսզի քաղաքացիները կարողանան զանգահարել և խախտումները արձանագրել: Արդեն բավական ժամանակ է, որ ՀՀ ոստիկանությունը աշխատում է նման ձևաչափով: Ես հույս ունեմ, որ նման կլոր սեղան-քննարկումներ կրկին կկազմակերպվեն, և մենք միմյանց երեսին բաց ճակատով կնայենք»:
Ոստիկանապետը հասարակությանը կոչ արեց ակտիվություն ցուցաբերել:
Խոսելով ստեղծված շտաբի մասին՝ ՀՀ ոստիկանության պետի առաջին տեղակալ Հ. Պողոսյանը նշեց. «Մենք շատ ենք կարևորում այս շտաբի ստեղծումը և առաջնահերթ խնդիր ենք համարում ընտրությունների օրվա ընթացքում պատշաճ կարգի պահպանումը: Մեզ համար ոչ մի նշանակություն չունի՝ տվյալ ուժը ընդդիմադիր է, թե դիմադիր»:
ԵԱՀԿ երևանյան գրասենյակի դեսպան Անդրեյ Սորոկինը նշեց, որ այս միջոցառումը կխթանի իրավապահ մարմինների աշխատանքը, և հասարակությունը ավելի լավ կիրազեկվի օրենքին: ԵԱՀԿ-ն հատուկ դասընթացներ է անցկացնում ոստիկաններին վերապատրաստելու համար:
Նույն թեմային անդրադառնալով՝ Հայաստանում ԵՄ պատվիրակության ղեկավար Օննո Սիմոնսեն նշեց. «Մինչ այս՝ ընտրությունները այնքան էլ ժողովրդավարական չեն անցել, բայց մենք մոտենում ենք դրան: Մայիսի 6-ի ընտրությունները կտարբերվեն մյուսներից, քանի որ կլինեն ժողովրդավար, ազատ ու թափանցիկ»:
ՀՀ ոստիկանության շտաբի պետ, ոստիկանության գնդապետ Վ. Եղիազարյանի խոսքով՝ ոստիկանությունը այս ընտրություններին հանդես է գալու այլ ձևաչափով, այսինքն՝ լինելու է ավելի բաց և թափանցիկ։ «Մենք պատրաստ ենք համագործակցել ցանկացած շահագրգիռ անձի հետ»,- ասաց նա:
