Մահվան դեպքերի 49%-ը սրտանոթային հիվանդությունների հետևանքով է. այսօր լրագրողների հետ հանդիպմանը տեղեկացրեց ՀՀ առողջապահության նախարարության հանրային առողջության բաժնի պետ Ալեքսանդր Բազարչյանը։ Ասուլիսին մասնակցում էր նաև «Էրեբունի» բժշկական կենտրոնի անհետաձգելի սրտաբանության բաժնի վարիչ, բժշկական գիտությունների թեկնածու, դոցենտ Համլետ Հայրապետյանը։ Բանախոսները համատեղ ասուլիսի ընթացքում անդրադարձան գարնանը սրտանոթային հիվանդությունների սրման և Հայաստանում այդ հիվանդությունների տարածման հարցերին:
Ըստ Հ. Հայրապետյանի՝ սրտանոթային հիվանդությունների տարածվածությունը Հայաստանում բարձր է, ինչը բնական է: Ա. Բազարչյանի խոսքով՝ այս հիվանդությունները զբաղեցնում են ամենաբարձր տեղերը նաև այլ երկրներում:
«Հայաստանում բարձր են սուր ինֆարկտի ցուցանիշները: Շատ բարձր է վարքագծային ռիսկերի դերը, դրանք են՝ ավելորդ քաշը, ոչ ակտիվ կենսակերպը, ալկոհոլի և ծխախոտի օգտագործումը։ Սրանք լրջագույն դեր են կատարում այս հիվանդությունների ձևավորման համար»,-նկատեց Ա. Բազարչյանը:
Համատեղ ասուլիսի ընթացքում Համլետ Հայրապետյանն ասաց, որ սրտի իշեմիկ հիվանդության, սրտամկանի սուր ինֆարկտի Հայաստանում շատ հաճախ կարելի է հանդիպել: Նրա խոսքով՝ կլինիկաները սկսել են ավելի շատ ծանրաբեռնվել, ինչի պատճառն այն է, որ ավելացել է հիվանդների թիվը, թեև վերջին տարիներին հիվանդությունը ավելի չի տարածվել:
Նա պարզաբանեց, որ նման հիվանդությունների տարածվածությունը կախված է երկրի սոցիալական վիճակից և հիմնախնդիրներից:
«Կան գործոններ՝ կապված մեր ապրելու կուլտուրայի հետ. սննդակարգ, ծխելու տարածվածություն, ադինամիա, գիրություն, ժառանգականություն, արյան մեջ խոլեստերինի բարձր կոնցենտրացիա։ Սակայն պակասել են ոչ միայն հիվանդանոցաին մահացության դեպքերը, այլև ախտորոշումն է բարելավվել՝ կապված նորագույն բուժման մեթոդների ներդրման հետ»,- մեկնաբանեց մասնագետը:
