Ռուսական ВЗГЛЯД թերթի փոխանցմամբ՝ Վրաստանի ռազմավարական օբյեկտների բաժնետոմսերի ոչ վերահսկիչ փաթեթները վաճառվելու են Լոնդոնի բորսայում: Դա մասնավորապես վերաբերում է (Ռուսաստան-Հայաստան) երկաթուղուն և Նավթի ու գազի միջազգային կորպորացիային (Ռուսաստան-Հայաստան գազատար): Այս մասին հայտարարել է Վրաստանի վարչապետ Նիկա Գիլաուրին:
Վերջինս կառավարության նիստում հիշեցրել է, որ խորհրդարանը դա թույլ է տվել դեռևս նախորդ տարվա աշնանը, սակայն Վրաստանը սպասել է բորսայում ավելի հարմար ժամանակներին: Նա հավելել է, որ այդ ընկերությունների մենեջմենթն իրականացնելու է պետությունը:
Հիշեցնենք, որ ավելի վաղ Գիլաուրին հայտարարել էր, որ Վրաստանի ռազմավարական օբյեկտների բաժնետոմսերի 20-25 տոկոսը վաճառվելու է Նյու Յորքի, Վարշավայի ու Լոնդոնի բորսաներում: Վրացական ընդդիմությունը դեմ է դրան, քանի որ այդ ամենի նկատմամբ հետաքրքրություն է ցուցաբերում Ռուսաստանը, ով դրա շնորհիվ կարող է ուժեղացնել իր վերահսկողությունը Վրաստանի տնտեսության նկատմամբ: