ՀՀԿ պատգամավորության թեկնածու, ՀՖՖ նախագահ Ռուբեն Հայրապետյանը այսօր լրագրողների հետ հանդիպմանը ասաց, թե չի պատրաստվում կնոջ, այս դեպքում՝ թիվ 1 ընտրատարածքում մեծամասնականով պատգամավորության թեկնածու առաջադրված Գայանե Առուստամյանի հետ քաղաքական բանավեճի գնալ:
«Ես նրա հետ հանդիպման չեմ պատրաստվում, չեմ էլ ճանաչում, ուղղակի իրեն կասեմ, որ իր առաջնորդները՝ առաջինից տասը համարը, բացառությամբ 3-րդ համարի (նա իմ ընկերն է), գան ինձ հետ բանավիճելու՝ ցանկացած ժամանակ: Ավելի լավ կլինի, որ նրա առաջնորդները գան:
Կոռեկտ չեմ համարում կնոջ հետ բանավիճել: Ուղղակի իր ոճից հասկանում եմ, որ Նիկոլի ոճի նման է. համ էլ կին է, բա որ բանավեճի ժամանակ ինձ իրո՞ք ճանկռեց»,- կեսկատակ-կեսլուրջ հավելեց Ռուբեն Հայրապետյանը:
«Ես, պապերս Ավանում ենք ծնվել, ես այստեղ շատ գործ եմ արել: Բայց երբ ասում են, որ ինձ «մեռած հոգիներն» են ձայն տալիս, վիրավորում են, ցույց տվեք մեկին, որ ինձ ձայն է տվել ու «մեռած հոգի է»ես պատրաստ եմ հրաժարական տալու: Ով ինչ պրոբլեմ ունի՝ խնդրեմ, թող դիմի ինձ, կօգնեմ: Ես կախարդական փայտիկ չունեմ, բայց որևէ մեկին չհայհոյելով, չվարկաբեկելով՝ պետք է փորձենք մարդկանց ուղղորդել դեպի մեզ»,- ասաց նա:
Հարցին՝ որքա՞ն հավանական է համարում կրկին վերընտրվելու իր հնարավորությունները, ՀՖՖ նախագահը նշեց, որ իր հետ առաջադրված բոլոր թեկնածուների հնարավորությունները հավասար են, սակայն ամեն բան ավելի կոնկրետ կերևա ընտրության օրը:
«Իմ առավելությունը կարող է միայն այն լինել, որ տարիներ շարունակ ապրել եմ այս համայնքում, օգնել այստեղի բնակիչներին, բայց ընտրողը իր գնահատականն ի վերջո կտա: Ուղղակի ես խոստանում եմ՝ եթե իմ մրցակիցներից որևէ մեկը ինձ հաղթի ընտրություններում, պատրաստ եմ գնալ ու սեղմել նրա ձեռքը»,- ասաց Ռուբեն Հայրապետյանը:
