Արդարադատության նախարարության «Նուբարաշեն» ՔԿՀ կալանավոր, ցմահ ազատազրկված Արմեն Տեր-Սահակյանը «Առավոտ»-ի հետ զրույցում հիշեցրել է, որ այս տարվա հունվարի ավարտվում է Ավան և Նոր Նորք վարչական շրջանների ընդհանուր իրավասության դատարանում իր դիմումի քննությունը. վիճարկվել էր Ա. Տեր-Սահակյանի ազատազրկման օրինականության հարցը:
«Ա. Տեր-Սահակյանը 15 տարի է, ինչ գտնվում է «Նուբարաշեն» քրեակատարողական հիմնարկում: Նա դատապարտվել էր պատժի առավելագույն չափի` զինված խմբի միջոցով ահաբեկություններ կատարելու համար: Արմեն Տեր-Սահակյանը հանրապետության ՆԳ նախկին նախարար Վանո Սիրադեղյանի մերձավորագույն շրջանակներից էր, «Հայոց համազգային շարժում» կուսակցության ակտիվիստներից: «Իմ նկատմամբ կատարվել է մեծ անարդարություն և օրենքի խախտումներ: ՀՀ քրօրի 34-104, 37-104 հոդվածներով ինձ կարող են դատապարտել տարիներով և ոչ թե առավելագույն պատժի չափով»:
Արմեն Տեր-Սահակյանը տասն օր առաջ դիմել է ՀՀ գլխավոր դատախազին, որպեսզի նա ընդունելություն կազմակերպի և մինչև ապրիլի 16-ը տվել է ժամանակ` իր գործի վերանայման համար:
«Ես քննություն եմ պահանջում, քանի որ ի հայտ են եկել նոր հանգամանքներ: Ես ուզում եմ, որ իմ գործն ուղարկվի քննչական խումբ: Մինչ օրս դատախազին ուղարկած դիմումիցս տեղեկություն չկա: Սպասում եմ նրա արձագանքին: Նրանք չեն կարող չգալ: Շատ լուրջ հանգամանքներ են»,-ասում է Ա. Տեր-Սահակյանը»,- ապա թերթը հավելում է.
«Ես ունեմ բացառիկ ձայնագրություններ: Վաղուց արված: Չեմ բացառում` ուղարկվեն դեսպանատներ, ընդդիմությանը, ինտերնետ»,- հավելում է նա:
Ըստ Տեր-Սահակյանի` իրեն դատել են նաև հանցագործության պարտակման, հանցագործությանը մասնակցելու հոդվածով, որի պատժաչափը 12 տարի է: «Իրենք քիլլեր են: Քիլլեր ասելով՝ նկատի ունեմ, որ դատարանները պետական զակազ են կատարում: Ինձ վրա դրել են դաժանաբար սպանություն հոդվածը: Սակայն ես սպանության մասնակից չեմ եղել, ես տանը քնած, ոնց են ինձ վրա այդ հոդվածը դրել: Հայաստանում դատական համակարգ գոյություն չունի: Ես հիմա բողոքել եմ վճռաբեկ դատարան: Մինչ այդ պահանջում եմ, որ իմ գործի հետաքննության հարցը Աղվան Հովսեփյանը կամ նրա կողմից ուղարկված քննչական խումբը իրականացնեն, քանի որ լուրջ ասելիք ունեմ: Եթե չգան, իմ ասելիքը կլինի շատ սենսացիոն, դարի հայտարարությունը կլինի, հայ ազգի համար»,- ասել է Ա. Տեր-Սահակյանը:
Ցմահ դատապարտվածի որդին ծառայում է ՀՀ զինված ուժերում, աղջիկը ճարտարագիտական համալսարանում է սովորում:
Արմեն Տեր-Սահակյանը նաև ասաց. «Իմ փաստաբանն այսօր ինձ տեսավ, ես շատ լավ եմ, առողջ վիճակում: Եթե իմ կյանքին մի բան պատահի, ուրեմն դա գալիս Է իշխանություններից»:
Թերթի այն հարցին, թե արդյոք ընտրությունների հետ կապված իրեն դիմե՞լ են, «բանակցություններ» եղե՞լ են իշխանական թևի հետ, պատասխանել է. «Իշխանական թևի հետ ես բանակցություններ ունեցել եմ 2008թ.-ին: Եկան ինձ մոտ: Ես ասացի՝ հաջողություն, դուք Ձեր քաղաքական պայքարը շարունակեք: Ես քաղաքականությունից դուրս եմ: Ես չեմ խառնվում ոչ Լևոն Տեր֊ Պետրոսյանի ընտրական պայքարին, ոչ Սերժ Սարգսյանի ընտրական արշավին:
Ես կյանքում ոչ մի կուսակցության անդամ չեմ եղել: ես ասել եմ՝ գնացեք Ձեր պայքարը շարունակեք առանց ինձ: եթե ես խառնվեի, կխառնվեի 15 տարի առաջ, երբ ինձ ասում Էին՝ անուն տուր, գնա տուն: Այսքան տարի նստել եմ, որ անուն տա՞մ»:
