Ֆլորիդայի դատախազությունը երկրորդ աստիճանի սպանության մեղադրանք է ներկայացրել սևամորթ դեռահաս Թրեյվոն Մարտինին սպանած հասարակական պարեկ Ջորջ Ցիմերմանի դեմ:
Ինչպես հաղորդում է Agence France-Presse-ը, այս պահին Ցիմերմանը ձերբակալված է: Նրան պահելու վայրն առայժմ չի հաղորդվում: Որոշ տեղեկություններով՝ 24 ժամվա ընթացքում նրան կտեղափոխեն առաջին ատյանի դատարան:
Հիշեցնենք. դեպքը տեղի էր ունեցել 2012 թ. փետրվարի 26-ին: Շրջանում պարեկություն կատարող 28-ամյա Ցիմերմանին կասկածելի էր թվացել 17-ամյա Մարտինի տեսքը, և նա այդ մասին հաղորդել էր 911-ով, այնուհետև սկսել էր հետևել Մարտինին: Նրանց միջև վեճ էր բռնկվել, որի ժամանակ էլ Ցիմերմանը կրակել էր երիտասարդի վրա: Սկզբնապես Ցիմերմանի դեմ մեղադրանք չէր ներկայացվել, քանի որ ոստիկանությունը, հենվելով նրա ցուցմունքների վրա, եզրակացրել էր, որ դա ինքնապաշտպանություն է եղել: Արդյունքում դեպքը լայն հասարակական արձագանք ստացավ, ինչի հետևանքով Ցիմերմանը հեռացավ տնից անհայտ ուղղությամբ: Բացի այդ, «անվտանգության նկատառումներով» նրան հեռացրին համալսարանից:
Ոստիկանության կողմից սկզբնապես Ցիմերմանի դեմ մեղադրանք չներկայացնելու հանգամանքն առաջացրեց ամերիկյան հասարակության դժգոհությունը: Ավելի քան 2.2 մլն մարդ այն կարծիքին էին, որ սպանությունը կատարվել է ռասայական ատելութան հողի վրա:
