«Երկիր»-ը գրում է, որ բարեգործության քողի ներքո ընտրակաշառքի բաժանումը հանրապետությունում մեծ թափ է հավաքել:
«Ինչպես միշտ, փայլում են իշխանական ուժերը: Մեզ հայտնի դարձավ, որ Մարտունիում տեղի մեծահարուստ հանրապետականները վճարում են ուսանողների ուսման վարձերը: Կլորիկ գումարներ ծախսելով` նրանք չեն հապաղում հիշեցնել, որ ազգուտակով հարկավոր է ձայն տալ ՀՀԿ-ին:
Նոր մեթոդ է մշակել նաև ՕԵԿ-ը. առաջարկում են օգնել վարկ ձևակերպել, մի մասն էլ` մուծել: Խոստանում են, որ եթե ՕԵԿ-ին ձայն տան, վարկի մարման ընթացքում էլ կօգնեն»:
«Երկիր»-ին հայտնի է դարձել նաև, որ, բացի չինական հեռախոսներից, ՕԵԿ-ը «օգնում է» նաև ապառիկով iPhone ձեռք բերել: Կանխավճարը մուծում է ՕԵԿ-ը, բայց եթե համապատասխան աջակցություն չստանան ընտրությունների ժամանակ, հեռախոսի պարտքը կմնա գնորդի վզին: