Նոբելյան մրցանակակիր գերմանացի գրող Գյունտեր Գրասի և Իսրայելի կառավարության միջև առճակատումը շարունակվում է: Երեկ գրողը Իսրայելի կառավարության այն որոշումը, որով իրեն արգելվել է մուտք գործել այդ պետության տարածք, համեմատել է Արևելյան Գերմանիայում ժամանակին գործող «Շտազի» գաղտնի ծառայության գործելաոճի հետ: Այս մասին հաղորդում է France Presse գործակալությունը:
Sueddeutsche Zeitung թերթում տպագրված հոդվածում նա նշել է, որ կյանքի ընթացքում իրեն երեք անգամ են արգելել մուտք գործել որևէ երկիր. նախորդ երկուսը Արևելյան Գերմանիան և Մյանմարն էին, որոնք հայտնի էին (են) իրենց դիկտատուրական ռեժիմներով: «Հիմա էլ դա անում է ժողովրդավարական երկրի նախարարը»,- ասել է Գրասը:
Հիշեցնենք, որ Գրասին արգելել են մուտք գործել Իսրայել այն բանից հետո, երբ գերմանացին գրել էր «Ինչ պետք է ասվի» բանաստեղծությունը, որում քննադատել էր Իսրայելի քաղաքականությունն Իրանի դեմ` աշխարհին կոչ անելով ուշադրություն դարձնել Իսրայելին` որպես աշխարհի փխրուն խաղաղությունը վտանգողի: Տեղեկացնենք նաև, որ Իսրայելի իշխանությունները նաև կոչ են արել զրկել Գրասին Նոբելյան մրցանակից:
