Սարկոզին և Օլանդը հայերին խոստացել են Ցեղասպանության հերքումը քրեականացնող օրինագծին նոր ընթացք տալ: Այս մասին «Առաջին լրատվական»-ի հետ զրույցում տեղեկացրեց Հայ-ֆրանսիական կազմակերպությունների կոմիտեի համանախագահ Արա Թոհանյանը`խոսելով Ֆրանսիայում մեկնարկած նախագահական ընտրությունների քարոզարշավի և հայ համայնքի տրամադրվածության շուրջ:
Նա նշեց, որ կցանկանան, որ այս երկու թեկնածուներից որևէ մեկը դառնա նախագահ՝ կամ գործող նախագահ Նիկոլա Սարկոզին, կամ նրա գլխավոր հակառակորդը՝ սոցիալիստ Ֆրանսուա Օլանդը: Ըստ Արա Թոհանյանի` երկուսն էլ խոսք են տվել, որ ընտրվելու դեպքում առաջինը, որ կանեն, դա կլինի Ցեղասպանության հերքումը քրեականացնող օրինագծին նոր ընթացք տալը: «Ֆրանսիայի հայ համայնքը երկու թեկնածուների օգտին էլ հավասարաչափ կքվեարկի, և սխալ են այն կարծիքները, թե հայ համայնքում չեն ցանկանում քվեարկել գործող նախագահի օգտին: Երկու թեկնածուներն էլ Ղարաբաղի մասին շատ բան չեն ասել, միայն ասել են, որ չպետք է պատերազմ լինի, և պետք է օգնեն այս ուղղությամբ»,- նշեց Արա Թոհանյանը` հավելելով, որ հայ համայնքը իր նախընտրությունը կտա այս երկու թեկնածուներին:
Հիշեցնենք, որ Ֆրանսիայում ապրիլի 9-ին պաշտոնապես մեկնարկել է նախագահական նախընտրական քարոզարշավը: Նախագահական ընտրությունների առաջին փուլը նշանակված է ապրիլի 22-ին: Սոցհարցումների առաջին եռյակում են գործող նախագահ Նիկոլա Սարկոզին, նրա գլխավոր հակառակորդ, սոցիալիստ Ֆրանսուա Օլանդը և ազգայնական թևի ներկայացուցիչ Մարին Լե Փենը: Երկրորդ փուլ դուրս գալու ամենահավանական շանսեր ունեն Սարկոզին և Օլանդը:
