Իրանական IRNA լրատվական գործակալության փոխանցմամբ՝ Իրանում Թուրքիայի դեսպան Ումիթ Յարդըմը հայտարարել է, որ Թուրքիան հուսով է, թե Իրանի ու «Վեցյակի» միջև բանակցությունները կանցնեն հաջող.
«Թուրքիան չի հանդիսանում Իրանի հետ բանակցող «Վեցյակի» անդամ, սակայն Թուրքիայի համար Իրանը հարևան ու բարեկամ երկիր է, և այդ պատճառով էլ Թուրքիայի համար չափազանց կարևոր են այդ բանակցությունների դրական արդյունքները: Իմ կարծիքով, բանակցությունների անցկացման վայրն այնքան կարևոր չէ, որքան որ բանակցությունների սկսումն ու դրանցում դրական արդյունքների հասնելը:
Անկարան մեծապես հուսով է, որ միջուկային բանակցությունները կունենան հաջող ավարտ: Մենք հարգանքով կընդունենք այն բոլոր համաձայնագրերը, որոնք ձեռք կբերվեն բանակցությունների արդյունքում:
Ինչ վերաբերում է իրանական նավթի ներկրման 20 տոկոսի կրճատման վերաբերյալ Թուրքիայի կառավարության որոշմանը, ապա ես ճշգրիտ չգիտեմ այդ որոշման տեխնիկական կողմը: Սակայն կարող եմ հստակ ասել, որ այդ որոշումը կայացվել է տնտեսական պատճառներով, և չի ազդի երկու երկրների հարաբերությունների վրա: Թուրքիան իրանական նավթի ու գազի հիմնական սպառողներից մեկն է»:
Հիշեցնենք, որ Թուրքիան իրանական նավթի ներկրումը 20 տոկոսով կրճատելու մասին հայտարարեց այն բանից հետո, ինչ Թուրքիայում ԱՄՆ դեսպան Ֆրենսիս Ռիկիարդոնեն հայտարարեց, որ մի շարք երկրներ զգալիորեն կրճատել են իրանական նավթի ներկրումը, և ԱՄՆ-ն նույնը ակնկալում է Թուրքիայից: Իրանի ու «Վեցյակի» միջև բանակցությունները տեղի են ունենալու ապրիլի 14-ին Ստամբուլում:
