ՀՅԴ-ն այս ընտրություններին իր հնարավորություններն ավելի մեծ է գնահատում. «Սիվիլիթաս» հիմնադրամում այսօր կազմակերպված քննարկման ժամանակ ասաց ՀՅԴ պատգամավոր Արա Նռանյանը:
Նրա խոսքով՝ կուսակցությունը հետևելու է ԱԺ ընտրությունների ընթացքում ի հայտ եկող խախտումներին ու կեղծիքներին: «Իսկ ընդհանրապես, մենք ներկայանում ենք բավական լուրջ ծրագրով: ՀՀ յուրաքանչյուր քաղաքացի մեր նախընտրական ծրագրում իրեն հարազատ հատված կգտնի»,- ասաց նա:
Քննարկմանը ներկա «Միավորված հայեր» կուսակցության ներկայացուցիչ Աշոտ Երանոսյանն էլ իր հերթին նկատեց, որ իրենք առաջին անգամ են մասնակցում ընտրություններին և դրանց պատրաստվում են ամենայն պատասխանատվությամբ:
«Կուսակցությունն ունի 5000 անդամ, և վստահ ենք, որ նրանց պոտենցիալը բավարարում է արժանի թվով քվեներ ստանալու: Ծրագրում ենք մարզային հանդիպումներ ունենալ ընտրողների հետ: Մեր ընտրազանգվածի մեծամասնությունը ինտելիգենցիան է, ում հետ խոսելու շատ բան ունենք»,- ասաց նա:
«Ժառանգություն» կուսակցության պատգամավոր Արմեն Մարտիրոսյանն էլ նշեց, որ իրենց մրցակիցը կոալիցիան է: «Կոալիցիայի կատարած կամ չկատարած աշխատանքների պատճառով է, որ երկիրն այսօր այս վիճակում է: Այնպես որ, ոչ ոք չպետք է խուսափի պատասխանատվությունից: Միաժամանակ, կարծում եմ, որ ՀՀԿ-ն նախընտրական շրջանում օգտագործելու է վարչական ռեսուրսները, նյութական «բարեգործությունը»՝ ընտրակաշառքը և այլն»,- ասաց նա՝ հավելելով, որ կուսակցությունը ձգտում է խորհրդարանական մեծամասնության:
Անդրադառնալով հանրային միասնական ընտրական շտաբի աշխատանքներին՝ Մարտիրոսյանը շեշտեց, որ «Ժառանգության» համար միանշանակ է՝ փաստաթուղթը պետք է ստորագրեն չորս քաղաքական ուժերի առաջնորդները:
Հայաստանի կոմունիստական կուսակցության ներկայացուցիչ Վազգեն Սաֆարյանը հավելեց, որ ԱԺ-ում գաղափարական պայքարն այս տարիներին բավարար չի եղել, և կոմունիստները խորհրդարանում ասելիք ու անելիք ունեն:
