Ռիք Սանտորումն այսօր հայտարարել է, որ դադարեցնում է ԱՄՆ Հանրապետական կուսակցության կողմից նախագահական թեկնածության համար մղվող իր քարոզարշավը:
Daily Mail-ը գրում է, որ Փենսիլվանիայի նախկին սենատորի այս որոշումը հնարավորություն է տալիս, որ Հանրապետական կուսակցության մյուս ներկայացուցիչ Միթ Ռոմնին նոյեմբերին կայանալիք նախագահական ընտրություններում պայքարի գործող նախագահ Բարաք Օբամայի դեմ:
Քարոզարշավի դադարեցման վերաբերյալ հայտարարությունն արվել է Փենսիլվանիայում՝ մամլո ասուլիսի ժամանակ: Երկու շաբաթից պետք է կայանային նախնական ընտրություններ Սանտորումի հայրենի նահանգում, որտեղ նրա հաղթանակը քիչ հավանական էր:
Սանտորումը վերջին մի քանի օրերն անցկացրել էր իր հիվանդ դստեր հետ, և ակնկալվում էր, որ կվերսկսի քարոզարշավն այս շաբաթ: Բայց նրա նկատմամբ մեծ ճնշում կար հենց հանրապետականների կողմից՝ այն բանից հետո, երբ Ռոմնին մի քանի հաղթանակներ էր տարել նախնական ընտրություններում:
Ընտանիքի ներկայությամբ Սանտորումն այսօր ասել է, որ իրենք այդ որոշումը կայացրել են «խոհանոցի սեղանի շուրջ՝ հանգստյան օրերին, և որոշել են, որ նախագահական ընտրությունների մրցավազքն իր համար ավարտված է»: