News Georgia-ի փոխանցմամբ՝ Վրաստանի նախագահ Միխեիլ Սաակաշվիլիի նախաձեռնությամբ Ռուսաստանի հետ գործող վիզային ռեժիմի վերացումից հետո Ռուսաստանից Վրաստան է այցելել Ռուսաստանի մոտ 30,000 քաղաքացի: Այս մասին այսօր տեղի ունեցած ճեպազրույցում հայտարարել է Վրաստանի նախագահի մամլո քարտուղար Մանանա Մանջգալաձեն.
«Փետրվարի 29-ից ցայսօր Վրաստանի սահմանը հատել է Ռուսաստանի մինչև 30,000 քաղաքացի: Դա 70 տոկոսով ավելի է՝ համեմատած նախորդ տարվա միևնույն ժամանակահատվածի հետ: Այս վիճակագրական տվյալները վկայում են Ռուսաստանի հետ գործող վիզային ռեժիմի միակողմանի վերացման վերաբերյալ որոշման ճշմարտացիության մասին: Ռուսաստանից զբոսաշրջիկների ներհոսքի ավելացման հետ մեկտեղ աճում են նաև ֆինանսական ռեսուրսները, որոնք ներդրվում են Վրաստանի զբոսաշրջային ենթակառույցներում»:
Հիշեցնենք, որ Սաակաշվիլիի հրամանով Ռուսաստանի հետ գործող վիզային ռեժիմը վերացվել է այս տարվա փետրվարի 29-ին: Երկու երկրների միջև վիզային ռեժիմը 2000 թվականին մտցվել է ռուսական կողմի նախաձեռնությամբ: Այժմ Վրաստանում մինչև 90 օրով գտնվելու համար Ռուսաստանի քաղաքացիներից վիզա չի պահանջվում:
