Ինչպես հաղորդում է Anadolu գործակալությունը, Թուրքիայի արտաքին գործերի նախարար Ահմեդ Դավութօղլուն հինգշաբթի հանդիպել է Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ Քեթրին Էշթոնին:
Իսկ իրանական «IRNA» գործակալության հաղորդմամբ, Ստամբուլում Իրանի և «վեցյակի» միջև կայանալիք բանակցություններում Իրանի բանագնաց Սայիդ Ջալիլին հունվարի 20-ին ժամանել է Ստամբուլ:
Ստամբուլում Ջալիլին դիմավորել են Թուրքիայում Իրանի դեսպան Բահման Հուսեյնփուրն ու Ստամբուլում Իրանի հյուպատոս Մուհամադ Հեյդարին:
Արդեն հայտնի է, որ կայացել է նաև Ջալիլի-Դավութօղլու հանդիպումը:
Հիշեցնենք, որ այսօր Թուրքիայում սկսվում է Իրանի միջուկային ծրագրի շուրջ բանակցությունների հերթական փուլը` 6+1 ֆորմատով (վեցյակի անդամներն են Ռուսաստանը, Ֆրանսիան, Գերմանիան, Չինաստանը, ԱՄՆ-ն և Մեծ Բրիտանիան): Բանակցությունները կտևեն երկու օր: