Այն, որ Հայաստանում շատ ինտենսիվ զարգացումներ են սպասվում, և Ռուսաստանը ցանկանում է ուժեղացնել իր դիրքերը՝ ակնհայտ է. այսօր կայացած մամուլի ասուլիսի ժամանակ ասաց Աշոտ Մանուչարյանը:
«Հայաստանի համար բավական խորը պայքար է գնում, քանի որ մեր երկիրը տարածաշրջանում կարևոր գործոն է: Սա է պատճառը, որ Ռուսաստանը մտնում է լուրջ պայքարի մեջ: Բախումն ու բալանսը, սակայն, բերելու են նրան, որ հայ ժողովուրդը հնարավորություն ստանա իրականացնել
իր նպատակները: Ռուսաստանի ներգործելու միջոցները բավական ազդեցիկ են: Նա, կարծես թե, վերջին փորձն է կատարելու՝ պաշտպանելու համար իր շահերը մեր տարածաշրջանում, բայց չի բացառվում, որ պարտություն կրի»,- ասաց նա:
Պատասխանելով հարցին՝ կարո՞ղ է Մաշտոցի պուրակում սկսված քաղաքացիական պայքարը վերաճել քաղաքականի, Մանուչարյանը դրական պատասխան տվեց:
«Կա մարդկանց մի զանգված, որը հաշտվում է ստեղծված իրավիճակի հետ, կան չկողմնորոշվածներ, սակայն կողմնորոշված դիրքորոշում ունեցողների թիվն էլ քիչ չէ: Միաժամանակ, հայրենի օլիգարխիայի համար վախի մթնոլորտ է առաջացել: Նրանք չպետք է մտնեին ընտրապայքարի մեջ, սակայն մտել են ու ցանկացած դեպքում պարտվելու են: Օլիգարխիան փրկության մեկ ճանապարհ ունի՝ դադարել օլիգարխիա լինել:
Օրինակ՝ Իրանի նախագահի հագուստը 100 դոլար արժե, մինչդեռ մերոնց փալաս-փուլուսը՝ 10000 դոլար»,- ասաց նա:
Անդրադառնալով ԼՂ հակամարտության կարգավորման հեռանկարներին՝ Մանուչարյանը նկատեց, որ առկա իրավիճակը իսկական նվեր է Ադրբեջանին, և մի շարք պատճառներից ելնելով՝ Ալիևին ձեռնտու է հակամարտության չլուծված մնալը:
