Նյու Ջերսի նահանգի Ֆիլիպսբուրգ քաղաքը շահել է իրավունք, որը թույլ կտա քաղաքի տարածքում տնկել արևելյան, բացառիկ սոճին: Այս ծառն աճեցվել է այն սերմերից, որոնք 1997 թվականի ապրիլին տիեզերքում են եղել:
NASA –ի փոխանցմամբ՝ սերմերը տիեզերք են ուղարկվել “Կոլումբիա” մաքոքի 22-րդ թռիչքի ժամանակ: Դրանք երկրից դուրս գտվել են 3 օր, 23 ժամ, 13 րոպե և 38 վայրկյան:
Ֆիլիպսբուրգի քաղաքային խորհրդի անդամ Ջոն Լիննը, որը նաև քաղաքի կանաչապատման հանձնաժողովի ղեկավարն է, հայտարարել է, որ ծառը քաղաքում աճեցնելու վերաբերյալ բանակցությունները վերջնական փուլում են: Նրա խոսքով՝ ծառը կտնկվի ապրիլի 28-ին՝ Ուոլթերս այգում՝ Ծառի օրվա կապակցությամբ:
Պաշտոնական տվյալներով՝ սպիտակ սոճու սերմերը տիեզերք են թռել 1997 թվականին: Այն առաջին բուսատեսակն է, որ հայտնվել է անկշռելիության պայմաններում:
Ֆիլիպսբուրգի քաղաքապետ Գարի Վուանտի խոսքով՝ ծառն այժմ 1.5 մետր բարձրություն ունի: Հատկանշական է, որ տիեզերքում եղած սերմերի աճը կրկնակի արագ է:
Այժմ ծառը գտնվում է Նյու Ջերսիի շրջակա միջավայրի պահպանության վարչությունում: Տեղի իշխանությունները որոշել են ծառն աճեցնելու իրավունքը տալ Ֆիլիպսբուրգին, քանի որ քաղաքային խորհուրդը խոստացել է թույլ տալ բոլոր ցանկացողներին տեսնել ծառը և մոտենալ դրան:
Աստղագետ Գրեգորի Լինեուրիսը, որն աշխատել է Կոլումբիա մաքոքում իր հետ տիեզերք է տարել սպիտակ սոճու 36 սերմ, որից 25-ը նա փոխանցել է Նյու Ջերսիի իշխանություններին:
