ԱՄՆ-ը ոչ մի նշան չի տեսնում, որ Սիրիայի կառավարությունը սկսել է իրականացնել ՄԱԿ-ի և ԱՊԼ հատուկ բանագնաց Քոֆի Անանի՝ հակամարտության խաղաղ կարգավորման ծրագիրը:
«Մենք ոչ մի նշան չենք տեսնում, որ նրանք պատրաստվում են ինչ-որ բան անել: Նրանք տանկերի և հրետանու ինչ-որ տեղափոխություններ են ձեռնարկել, բայց միայն նրա համար, որպեսզի դրանք օգտագործեն այլ շրջաններում»,- ասել է ԱՄՆ պետքարտուղարության պաշտոնական ներկայացուցիչ Վիկտորյա Նուլանդը երկուշաբթի տեղի ունեցած ճեպազրույցում:
Ինչպես հաղորդում է Sky News-ը, Նուլանդը հիշեցրել է Սիրիայի կառավարության հարձակումների հետևանքով նոր զոհերի մասին և ասել. «Կարո՞ղ ենք մենք լավատեսություն արտահայտել, որ նա (նախագահ Բաշար Ալ-Ասադը.- 1in.am) կիրականացնի իր պարտականությունները (համաձայն Անանի ծրագիր.- 1in.am): Ոչ: Բայց մենք պատրաստվում են սպասել մինչև վերջնաժամկետը՝ վաղը, դա ամեն ինչ ցույց կտա»,- ասել է Նուլանդը:
Բացի այդ, Նուլանդը հայտարարել է, որ ԱՄՆ-ը քննարկում է Թուրքիայում սիրիացի փախստականների վրա ճնշումները և խոստանում շարունակել աջակցությունը սիրիացի ժողովրդին իշխանությունների դեմ պայքարում: Հիշեցնենք, որ ավելի վաղ Թուրքիայի ԱԳՆ-ից հայտնել էին, որ սիրիական բանակը ապրիլի 9-ի առավոտյան կրակ է բացել թուրքական տարածքում սիրիացի փախստականների ճամբարի վրա, ինչի հետևանքով 4 մարդ վիրավորվել է:
«Մեզ ապշեցնում է բռնության աճը, և մենք կանենք ամեն ինչ, որպեսզը ավելացնենք ճնշումը Բաշար Ասադի վրա: Մենք նաև կաջակցենք Սիրիայի ժողովրդին այնքան ժամանակ, մինչև որ նա ստանա իր երազած և իրեն արժանի ապագան»,- ասել է Նուլանդը:
Հիշեցնենք. պաշտոնական Դամասկոսն իր համաձայնությունն էր տվել Անանի ծրագրին և խոստացել մինչև ապրիլի 10-ը դուրս բերել զորքերը քաղաքներից: Ավելի ուշ Սիրիայի իշխանությունները հայտարարեցին, որ դուրս չեն բերի զորքերը քաղաքներից, եթե ընդդիմությունից կրակը փոխադարձաբար դադարեցնելու գրավոր երաշխիքներ չստանան: Ընդդիմությունը հրաժարվեց համապատասխան երաշխիքներ տալ:
