Կուսակցությունների հանդեպ ընտրողների վստահությունը նվազել է, և նախընտրական քարոզարշավի ընթացքում հանրությանը մատուցվող տեսահոլովակները դժվար թե կարողանան դրական ազդեցություն գործել մարդկանց վրա: «Առաջին լրատվական»-ի հետ զրույցում ասաց հոգեբան Ռուբեն Պողոսյանը:
«Որքան էլ քաղաքական տեսահոլովակների միջոցով կուսակցությունները ջանում են վստահություն շահել, միևնույն է, հիասթափված ընտրողները թունելի վերջում լույս չեն տեսնում: Թեպետ գիտակցության մեջ նրանք համակրում են այս կամ այն քաղաքական ուժին, սակայն զգայական, աֆեկտիվ մակարդակներում այդ կուսակցությունները տեղ չեն գրավում: Այս հակազդեցությունն էլ, ի վերջո, բերում է ներանձնային բախումների»,- ասաց հոգեբանը:
Ռուբեն Պողոսյանի խոսքով՝ հասարակության մի զգալի հատվածն անհաղորդ է անգամ «կենդանի» քարոզարշավին՝ կուսակցությունների ներկայացուցիչների հետ դեմառդեմ հանդիպումներին:
Հիշեցնենք, որ համացանցում արդեն իսկ «պտտվում են» մի շարք կուսակցությունների նախընտրական տեսահոլովակները:
