Անդրադառնալով ՀՀ ԿԳ նախարար Արմեն Աշոտյանի` իրեն խիստ նկատողություն տալու հրամանին՝ Երևանի Վ. Բրյուսովի անվան լեզվաբանական համալսարանի ռեկտոր Սուրեն Զոլյանն «Առավոտ»-ին ասել է.
«Չգիտեմ, թե ինչ նմանատիպ, աչքի ընկնող նվաճումներ ունի Տիգրան Սարգսյանի կառավարությունը, սակայն այդ հրամանի շնորհիվ այն հաստատ կարող Է հավակնել Գինեսի գրքում հայտնվելուն: Իսկապես` ինչ մտքի տեր պետք Է լինել, որպեսզի Եվրախորհրդի Նախարարների խորհրդի կողմից ընտրված Փոքրամասնությունների կամ տարածաշրջանային լեզուների եվրոպական խարտիայի փորձագետների կոմիտեի անդամին խիստ նկատողություն հայտարարել Կոմիտեի պլենար նիստին մասնակցելու համար: Եվ դա այն դեպքում, երբ համապատասխան Խարտիայում հստակ նշված է, որ կառավարությունը չպիտի միջամտի փորձագետի գործունեությանը:
Պարզից Էլ պարզ Է. դատարանը անվավեր կճանաչի այս անհեթեթ հրամանը, ուստի ես որևէ անհանգստանալու բան չունեմ: Պարոն Աշոտյանը ակնհայտորեն գերազանցել է իր լիազորությունները, նույն հաջողությամբ նա կարող էր հրամայել ինձ գլխատել կամ աքսորել Լուսին: Սակայն այստեղ ես նաև դրական բան եմ տեսնում, դատաքննության ընթացքում կհրապարակվի այս որոշմանը նախորդած նամակագրությունը և ակներև կդառնա պարոն Աշոտյանի մտավոր և բարոյական մակարդակը, ինչից թող հետևություններ անեն նրա գործընկերները կառավարությունում և կուսակցությունում:
Դիմելու ենք նաև վարչապետին, որպեսզի նա նախ` վերացնի նշված հրամանը և որոշի պարոն Աշոտյանի հետագա պաշտոնավարման նպատակահարմարությունը: Թե չէ՝ ժողովրդի լեզվով ասած՝ հիվանդը չի ամաչում, հիվանդի տերն է ամաչում»:
