Եգիպտոսի իսլամական կուսակցությունները մտադիր են երկրում կայանալիք նախագահական ընտրություններում դիմադրել նախկին փոխնախագահ, հետախուզության ազգային ծառայության նախկին ղեկավար Օմար Սուլեյմանի մասնակցությանը, ով արդեն պաշտոնապես գրանցվել է որպես երկրի նախագահի թեկնածու: Այս մասին գրում է РИА Новости-ն:
«Մենք մտադիր չենք ձեռքներս ծալած նստել և նայել, թե ինչպես է Մուբարաքի մերձավոր կողմնակիցը վերադառնում քաղաքական հարթակ և կրկին ձգտում իշխանության»,- երկուշաբթի օրը հայտարարել է «Ան-Նուր» սալաֆիտյան կուսակցության պաշտոնական ներկայացուցիչ, պահպանողական իսլամի կողմնակիցների շահերը ներկայացնող Նադիր Բաքարը: Համացանցում կուսակցության պաշտոնական էջում նա պարզաբանել է, որ «Ան-Նուր»–ը սկսում է ակցիաների շարք` ուղղված Սուլեյմանի նախագահ դառնալու դեմ: Այդ ակցիաներից առաջինը պետք է դառնա քաղաքական մեկուսացման մասին օրենքը, որի օգտին «Ան-Նուր»–ը մտադիր է քվեարկել Եգիպտոսի խորհրդարանի մոտակա նիստի ժամանակ:
Նախօրեին Եգիպտոսում առավել ազդեցիկ քաղաքական ուժի` «Մուսուլման եղբայրներ» իսլամիստական շարժման կողմից առաջադրված թեկնածու Խայրաթ Աշ-Շաթիրը հայտարարել էր, որ Սուլեյմանի` նախագահական ընտրություններում մասնակցելը «ինքնին դավաճանություն է եգիպտական հեղափոխությանը»: Աշ-Շաթիրը զգուշացրել է, որ Սուլեյմանի հաղթանակի դեպքում «կսկսվի երկրորդ հեղափոխությունը»:
Ներկա դրությամբ սալաֆիտյան շարժման և «Մուսուլման եղբայրներ»–ի կողմնակիցները եգիպտական հասարակության մեջ բացառիկ ազդեցություն ունեն:
Օմար Սուլեյմանը նախագահի իր թեկնածությունը պաշտոնապես գրանցել է կիրակի օրը:
Եգիպտոսում նախագահական ընտրությունները տեղի կունենան մայիսի 23-24-ը: Նոր նախագահի անունը, ինչպես ենթադրվում է, կհրապարակվի մինչև հունիսի վերջը:
