«Բարգավաճ Հայաստան» կուսակցության նախագահ Գագիկ Ծառուկյանի այն հայտարարությունը, որ ինքը պատրաստ է կորցնել ամեն ինչ, բայց ժողովրդի, հանրության հավատը սրբությամբ պահպանել, տիպիկ նախընտրական ճառ է, ոչ ավելին: «Առաջին լրատվական»-ի հետ զրույցում ասաց ՌԱՀՀԿ տնօրեն Մանվել Սարգսյանը:
«Նա այս արտահայտությամբ փորձում է տպավորություն ստեղծել, թե իր ունեցածն իր իսկ համար ոչ մի արժեք չունի, քանի որ ողջ կյանքը նվիրել է սեփական ժողովրդին: Բայց հարց է՝ հանուն ինչի՞ է նա պատրաստ ամեն ինչ կորցնել: Բոլորն էլ նախընտրական շրջանում նման մի բան ասում են»,- նկատեց փորձագետը:
Մանվել Սարգսյանը քիչ հավանական համարեց, որ Գագիկ Ծառուկյանի հայտնած այսօրինակ միտքը ԲՀԿ վերին օղակներում ինչ-ինչ տարաձայնությունների հետևանք լինի:
Նշենք, որ նախընտրական քարոզարշավի առաջին օրը հանդիպում ունենալով աբովյանցի ընտրողների հետ՝ «Բարգավաճ Հայաստան» կուսակցության նախագահ Գագիկ Ծառուկյանը իր 15 րոպեանոց ելույթում հայտարարել էր. «Այսօր ինձ համար ծանր է, դժվար է: Ես պատրաստ եմ կորցնել ամեն ինչ, բայց ժողովրդի, հանրության հավատը սրբությամբ պահպանել: Ես երբեք ու երբեք այդ հավատը չեմ կորցնելու»:
