Մեծ Բրիտանիայի իմիգրացիոն տրիբունալն անօրինական է համարել երկրի կառավարության կողմից Իսրայելի մուսուլմանների առաջնորդ շեյխ Ռաիդ Սալահին երկրից վտարելու որոշումը: Ինչպես հաղորդում է BBC-ն, ապրիլի 7-ին Սալահը դատարանից համապատասխան նամակ է ստացել:
Իմիգրացիոն տրիբունալը, ի տարբերություն ներքին գործերի նախարար Թերեզա Մեյի, նրան սպառնալիք չի համարել Մեծ Բրիտանիայի անվտանգության համար: Ըստ դատարանի՝ մյուս երկրները նույնպես, որտեղ եղել է Սալահը, նրան վտանգավոր չեն համարում իրենց ներքին անվտանգության համար:
Այժմ շեյխ Սալահը պատրաստվում է վերադառնալ Իսրայել: Ներքին գործերի նախարարությունն իր դժգոհությունն է հայտնել դատարանի վճռի կապակցությամբ և պատրաստվում է բողոքարկել այն:
Սալահը Լոնդոն էր եկել 2011 թ. հունիսին Middle East Monitor-ի (MEMO) հրավերով: Նա երկրում պետք է անցկացներ ընդամենը 10 օր, որպեսզի այդ ընթացքում մասնակցություն ունենար մի քանի հրապարակային միջոցառումների: Մասնավորապես, նա պետք է ելույթ ունենար խորհրդարանականների առաջ:
Լոնդոն նրա ժամանելուց երկու օր առաջ Բրիտանիայի ներքին գործերի նախարարությունը նրան հայտարարել էր «պերսոնա նոն գրատա» և արգելել մուտք գործել երկիր: Սակայն այդ փաստաթուղթը Սալահին ժամանակին չէր ներկայացվել և նա առանց խոչընդոտի անցել էր սահմանը: Միայն նրա այցի երրորդ օրը նրան ձերբակալել էին Լոնդոնի հյուրանոցներից մեկում: Սալահը կալանքի տակ է պահվել 21 օր, որից հետո գրավի դիմաց նրան ազատ են արձակել: Դատական գործընթացի շրջանում Սալեհը մնում էր Մեծ Բրիտանիայում:
Իսրայելում Ռաիդ Սալեհը հայտնի է ոստիկանների հետ իր անձնական կոնֆլիկտներով: 2010 թ. նա 5 ամիս ազատազրկման է ենթարկվել իրավապահ մարմինների աշխատակցի դեմքին թքելու համար: 2011 թ. նա ձերբակալվել է իսրայելա-հորդանանյան սահմանին ոստիկանի վրա հարձակվելու համար: Բացի այդ, նրան մեղավոր են համարում 2010 թ. «Ազատության նավատորմի» շուրջ ծավալված իրադարձություններին մասնակցելու համար:
