Հոնկոնգում պարտքերի պատճառով ձերբակալված ռուս-ուկրաինական «Սախալին» նավի անձնակազմը նավաստիների արհմիության օգնությամբ դատարանում թույլտվություն է ստացել վաճառել շոգենավը՝ պարտքերը վճարելու համար: Ինչպես հաղորդում է Interfax-ը՝ վկայակոչելով Ռուսաստանի նավաստիների արհմիության փոխնախագահ Նիկոլայ Սուխանովին, շոգենավի համար աճուրդը նշանակված է մայիսի սկզբին:
Նա նշել է, որ նավի բուլղարացի սեփականատերը անցյալ տարվա հոկտեմբերից չի վճարում անձնակազմի և նավի ծառայությունների համար:
Նավի ծառայությունների համար ընդհանուր պարտքը նավահանգստին և նավաստիներին կազմում է շուրջ 5.5 մլն դոլար, ընդ որում, նավի գինը գնահատվում է 3.5 մլն դոլար: Սուխանովի խոսքերով՝ այս պահին տեղի իշխանությունները նավաստիներին ապահովում են ջրով, սննդով և վառելիքով: «Այդ ամենն իհարկե անվճար չէ: Դա նույնպես մտնում է պարտքի մեջ»,- ասել է նա:
