«Ալ-Քաիդայի» հետ կապված կազմակերպությունը իր վրա է վերցրել Մալիում ալժիրյան դիվանագետներին առևանգելու պատասխանատվությունը, հաղորդում է ИТАР ТАСС-ը:
Խմբավորումն այսօր հայտարարել է, որ հենց ինքն է կանգնած մալիական Գաո քաղաքում Ալժիրի հյուպատոսությոան վրա հարձակման և հյուպատոսի ու նրա վեց աշխատակիցների առևանգման հետևում:
Այդ խումբը «Արևմտյան Աֆրիկայում շարժում հանուն միասնության և ջիհադի» խումբն է: Այն ապստամբ տուարեգների հետ օկուպացրել է Մալիի հյուսիսը` այդ հատվածը հռչակելով անկախ պետություն: Խմբի ներկայացուցիչ Ադնան Աբու Վալիդ Սախրաուին հաղորդել է, որ առևանգված դիվանագետները «ողջ և առողջ են», և որ պահանջներն ավելի ուշ կներկայացնեն:
Անցած տարվա դեկտեմբերին «Արևմտյան Աֆրիկայում շարժում հանուն միասնության և ջիհադի» խումբն առևանգել էր մարդասիրական գործակալությունների աշխատակիցների` երկու իսպանացու և մեկ իտալացու: Այժմ ծայրահեղականները այդ երկրների կառավարությունների հետ բանակցություններ են վարում գերիներին ազատ արձակելու պայմանների վերաբերյալ: Նախնական տվյալներով` նրանք պահանջում են 30 միլիոն եվրո փրկագին:
