Հյուսիսային Կորեան պատրաստվում է միջուկային փորձարկումներ կատարել: Այս մասին հայտնել է «Ռենհափ» գործակալությունը` հղում անելով հարավկորեական հետախուզության աղբյուրին:
Գործակալության տեղեկատվության համաձայն` ԿԺԴՀ-ը Համգեն-Պուկտո շրջանում զինում է ստորգետնյա թունել, որտեղ նախկինում երկու անգամ անցկացվել են միջուկային փորձարկումներ: Ենթադրվում է, որ միջուկային ստորգետնյա փորձարկումներ իրականացնելու աշխատանքները վերջնական փուլում են:
ԿԺԴՀ-ն պաշտոնապես դեռևս չի հաստատել կամ ժխտել այս տեղեկատվությունը:
ԿԺԴՀ-ն 2006 և 2009 թթ. իրականացրել է ստորգետնյա միջուկային պայթյուններ: Գործակալության ներկայացմամբ` երկու դեպքում էլ միջուկային փորձարկումներին հետևել է հրթիռների արձակում:
Հիշեցնենք, որ ԿԺԴՀ-ն նախատեսում է ապրիլի 12-16-ն ընկած ժամանակահատվածում հրթիռ արձակել` նվիրված երկրի առաջին ղեկավար Կիմ Իր Սենի 100- ամյակին: Նախնական ծրագրի համաձայն` արբանյակի առաջին աստիճանը ընկնելու է Հարավային Կորեայի արևմտյան ափերի մոտ, իսկ երկրորդ աստիճանը` Ֆիլիպինների գլխավոր կղզի Լուսոնի մոտակայքում:
