Apple–ը կդառնա աշխարհում 1 տրիլիոն արժողությամբ առաջին ընկերությունը, երբ նրա բաժնետոմսերի գինը հասնի 1000 դոլարի: Այս մասին կանխատեսումներ են արել Wall Street-ի վերլուծաբանները:
Տեխնոլոգիական հսկայի բաժնետոմսերի գինը անցած շաբաթ 633.38 դոլար էր` առաջին անգամ բարձր Google-ի բաժնետոմսերից: Topeka Capital Markets-ի ներկայացուցիչ Բրայան Ուայթի խոսքով` Apple-ի բաժնետոմսերի գինն առաջիկա 12 ամսում ռեկորդային ցուցանիշի կհասնի:
Apple-ի գործադիր տնօրեն Թիմ Կուկի խոսքով` Ստիվ Ջոբսի մահից հետո ինքը ջանք չի խնայում ընկերության հաջող գործունեությունը շարունակելու համար հնարավոր ամեն ինչ անել: «Apple-ի արտադրանքներ ունենալու տենդն աշխարհում տարածվում է այնքան արագ, որքան անտառային հրդեհը»,- ասել է Կուկը:
Կանխատեսումների համաձայն` տեխոնոլոգիական հսկայի բաժնետոմսերի գինը 2014 թվականին կհասնի 1000 դոլարի:
Կուպերտինոյում տեղակայված Apple ընկերությունն արդեն իսկ աշխարհի ամենաթանկ ընկերությունն է, այն գնահատվում է 590.82 միլիարդ դոլար:
Ուղիղ մեկ տարի առաջ Apple-ի բաժնետոմսերի գինը գնահատվում էր 341 դոլար: Հունվարին ընկերությունը հայտարարեց, որ կրկնապատկել է եկամուտները` 2010 թվականի նույն ժամանակահատվածի համեմատ` դարձնելով 13 միլիարդ դոլար: Հաջողության հիմքում 2011 թվականի վերջին կիսամյակում iPhone-ների ռեկորդային վաճառքն էր: Նախորդ տարվա նույն ժամանակահատվածի համեմատ՝ բջջայինների վաճառքն ավելացել է 128 տոկոսով:
