«Առաջին լրատվական»-ի հետ զրույցում Հայաստանում Մեծ Բրիտանիայի դեսպան Չարլզ Լոնդեյլը ներկայացրեց իր երկրի տեսակետը Հայաստանի համար կարևորագույն երկու հարցերի` Ղարաբաղյան հակամարտության և հայ-թուրքական հարաբերությունների վերաբերյալ: Դեսպանը մասնավորապես ասաց. «Մեծ Բրիտանիան, ինչպես և ՆԱՏՕ-ն, Լեռնային Ղարաբաղի հարցի կարգավորման մեջ կարևորում և վստահում է Մինսկի խմբին: Համանախագահները կազմակերպում են հանդիպումեր նախագահների և արտգործնախարարների միջև: Վերջինը Մոսկվայում կազմակերպված արտգործնախարարների հանդիպումն էր: Մենք լիովին վստահում ենք Մինսկի խմբին և համոզված ենք, որ այն կունենա իր կառուցողական և դրական ներդրումը այս հակամարտության լուծման համար»: Իր գաղութներին ինքնորոշման իրավունքով անկախություն տված, Կոսովոյի և Սուդանի հռչակած անկախությունը ճանաչած երկրի ներկայացուցիչը կարծում է, որ Ղարաբաղի հարցում պետք է հաշվի առնվեն միջազգային իրավունքի բոլոր սկզբունքները: «Այս բոլոր հակամարտությունները որքան նմանություններ ունեն, այնքան էլ՝ տարբերություններ: Կոսովո, Հարավային Օսիա, Սուդան, Լեռնային Ղարաբաղ՝ սրանցից յուրաքանչյուրը շատ տարբեր են, և տարբեր մոտեցումներ են պահանջում»,- կարծում է դեսպանը: «Ցանկացած հակամարտություն կարգավորելու համար պետք է գործեն միջազգային իրավունքի բոլոր սկզբունքները, չի կարելի մի սկզբունքը ավելի բարձր դասել, քան մյուսը, քանի որ այդ սկզբունքները հավասար են: Պետք է միջազգային իրավունքի բոլոր տեղին սկզբունքները գործեն, որպեսզի հասնենք հակամարտող երկու կողմերի համար էլ ընդունելի կարգավորման»:
Անդրադառնալով հայ-թուրքական հարաբերություններին` դեսպան Չարլզ Լոնդեյլը կարծում է, որ ՆԱՏՕ-ի իր դաշնակից Թուրքիան պիտի բացի Հայաստանի՝ 1993 թվից փակ սահմանը, ընդ որում` առանց նախապայմանների: «Հարաբերությունները Թուրքիայի և Հայաստանի միջև պետք է կարգավորվեն: Մենք աննորմալ ենք համարում փակ սահմաններ ունենալը այս դարաշրջանում: Ինչպես հայտնի է, Թուրքիան ձգտում է Եվրամիություն մտնել: Դա անելու համար նա պետք է խնդիրներ չունենա հարևանների հետ, պետք է ձերբազատվի բոլոր նման խնդիրներից»,- կարծիք է հայտնում Հայաստանում Մեծ Բրիտանիայի դեսպանը: