News Georgia-ի փոխանցմամբ`Վրաստանի նախագահ Միխեիլ Սաակաշվիլին երեկ զննել է Բելառուսից բերված նոր տրակտորները: Սաակաշվիլին անգամ անձամբ փորձարկել է դրանցից մեկը: Նա հայտարարել է, որ այս տարի Վրաստանում պլանավորված է ավելի շատ գյուղատնտեսական տարածքի մշակում.
«Չնայած երկար ու ծանր ձմռանը, ինչի պատճառով հետաձգվեցին գարնանային աշխատանքները, և չնայած վառելիքի համաշխարհային գնաճին՝ մենք գյուղերին ապահովելու ենք ցածր գներով ներկրված տրակտորներով ու գյուղատնտեսական այլ տեխնիկայով՝ նվազեցնելու համար հողերի մշակման արժեքը: Վրացական մրցունակ գյուղմթերքը պետք է ոչ միայն գերիշխի ներքին շուկայում, այլև այն պետք է արտահանվի:
Այս տարի մեր առաջադրանքը անկախության ձեռքբերումից հետո աննախադեպ շատ գյուղատնտեսական տարածքի մշակումն է ու գյուղատնտեսական արտադրանքի արտադրության մեծացումը: Մենք այս տարի մշակելու ենք այնպիսի տարածքներ, որոնք մինչ այդ երբեք չեն մշակվել»:
Վրաստանի տարբեր շրջաններին հատկացվել է մոտ 130 տրակտոր: Վրաստանի գյուղատնտեսության նախարար Զազա Գորոզիան հայտարարել է, որ իրենք Բելառուսից բերելու են ևս 284 տրակտոր, իսկ այլ երկրներից՝ 300 տրակտոր:
Հիշեցնենք, որ այս տարվա մարտի 16-ին Վրաստանի խորհրդարանը հաստատեց երկրի Հարկային օրենսգրքում փոփոխություններ մտցնելու օրինագիծը, ըստ որի՝ գյուղատնտեսության ոլորտի առաջին նշանակության արտադրանքն ազատվում է ավելացված արժեքի հարկից (ԱԱՀ): Այս նախաձեռնությունը պատկանում է Սաակաշվիլիին, որն ավելի վաղ հայտարարել էր, թե Վրաստանում չպետք է մնա որևէ թիզ անմշակ հողատարածք:
Ի դեպ, Սաակաշվիլին գյուղատնտեսական ոլորտն ընդգրկել է այն երեք առանցքային ուղղությունների (էներգետիկ ենթակառույցներ և զբոսաշրջություն) թվում, որոնց իրենց ջանքերը պետք է բևեռեն վրացի գործարարները, և որոնք հնարավորություն են տալիս արագորեն զարգացնել երկրի տնտեսությունը:
