Այսօր ՀՀ Վարչական դատարանը մերժել է Գորիսի նախկին քաղաքապետ Սամվել Հարությունյանի հայցադիմումն այն մասին, թե Սիսիան, Գորիս և տարածաշրջանի մի քանի գյուղերը ներառող թիվ 37 ընտրատարածքում առաջադրված առողջապահության նախկին փոխնախարար Թաթուլ Հակոբյանը որպես թեկնածու գրանցվելու իրավունք չունի, քանի որ վերջին 5 տարում չի ապրել Հայաստանում:
Այս ընտրատարածքում Թաթուլ Հակոբյանից բացի, իրենց թեկնածությունն էին առաջադրել մարզպետ Սուրիկ Խաչատրյանի թեկնածուն` ՀՀԿ-ական Հայկ Գրիգորյանը, անկուսակցականներ Մալիկ Թելունցը, Թաթուլ Հակոբյանը, Արտակ Սիսակյանը, Վարազդատ Վարդազարյանը և Սամվել Հարությունյանը: Անկուսակցական Արտակ Սիսակյանն ավելի վաղ ինքնաբացարկ էր հայտնել, իսկ երեկ «Առաջին լրատվական»-ը տեղեկացրել էր, որ թիվ 37 ԸԸՀ ինքնաբացարկի դիմում է ներկայացրել Մալիկ Թելունցը, սակայն ԿԸՀ-ն դեռևս չի հաստատել ինքնաբացարկի որոշումը:
Ի դեպ, Սյունիքի մարզն ընդգրկող թիվ 37 և 38 ընտրատարածքներում ԲՀԿ-ն թեկնածու չի առաջադրել: «Առաջին լրատվական»-ի տեղեկություններով՝ Սիսիանի ԲՀԿ-ական քաղաքապետ Աղասի Հակոբջանյանը Սիսիանի կրթօջախներում հանդիպումների ժամանակ արդեն կոչ է արել առաջիկա ընտրություններին ընտրել Բարգավաճ Հայաստանին, իսկ թիվ 37-ում սատարել անկուսակցական Թաթուլ Հակոբյանին: Նշենք, որ Բարգավաճ Հայաստանը դեռևս որևէ պաշտոնական հայտարարություն չի արել:
