Օրերս ՀՀ ԿԱ ՊԵԿ մաքսանենգության դեմ պայքարի և կրկնակի մաքսային հսկողության վարչության աշխատակիցները, իրացնելով օպերատիվ տեղեկությունները, Մեղրիի մաքսակետում հսկողության են ենթարկել Թեհրան-Երևան ուղևորային ավտոբուսով ժամանած ՀՀ քաղաքացի Զավեն Ստեփանյանին: Վերջինիս ճամպրուկում հայտնաբերվել է մետամֆետամին թմրամիջոց, որի ընդհանուր քաշը կազմել է 28 գրամ: Հիշեցնենք, որ մետամֆետամինի 1.5 գրամն արդեն իսկ ըստ ՀՀ Քրեական օրենսգրքի համարվում է առանձնապես խոշոր չափերի թմրամիջոց:
Իսկ Բավրայի մաքսակետում վարչության աշխատակիցները, իրացնելով օպերատիվ տեղեկությունը, Ստամբուլ-Երևան երթուղու ավտոբուսի ուղևոր, ՀՀ քաղաքացի Անդրանիկ Ղազարյանի մոտ հայտնաբերել են մաքսային հսկողությունից թաքցրած 211 գրամ ընդհանուր քաշով դեղին և սպիտակ ոսկյա զարդեր, որոնք ուղևորը փորձում էր տեղափոխել` թաքցնելով կոշիկների մեջ:
ՊԵԿ տեղեկատվության և հասարակայնության հետ կապերի բաժնից «Առաջին լրատվական»-ին հայտնեցին, որ Բագրատաշենի մաքսակետում էլ մաքսային հսկողության են ենթարկել Ստամբուլ-Երևան երթուղով ժամանած ավտոբուսի ուղևոր, ՀՀ քաղաքացի Անդրանիկ Մանուկյանի ուղեբեռը: Պարզվել է, որ Մանուկյանը, մաքսային հսկողությունից թաքցնելով, փորձում էր ներմուծել արծաթյա տարբեր տեսակի զարդեր, որոնց քաշը գերազանցում էր 1 կիլոգրամը:
Ի դեպ, 2011թ. ընթացքում ՊԵԿ մաքսանենգության դեմ պայքարի և կրկնակի մաքսային հսկողության վարչությունը կանխել է ոսկյա և արծաթե իրերի մաքսանենգության մի շարք դեպքեր, որոնցով փորձ է արվել հանրապետություն ներկրել ավելի քան 4 կգ չհայտարարագրված զարդեր:
