Ադրբեջանական Գաբալայի փոխարեն Հայաստանում ռուսական նոր ռադիոտեղորոշիչ կայան կառուցելու մասին խոսակցությունները փաստում են, որ մեր երկիրը Ռուսաստանին ռազմական առումով շատ ավելի բան ունի առաջարկելու: Այսօր կայացած մամուլի ասուլիսի ժամանակ այս մասին ասաց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը` անդրադառնալով հայ-ռուսական ռազմական հարաբերություններին և Գաբալայի ռադիոտեղորոշիչ կայանի շուրջ քննարկումներին:
«Պատահական չէր, որ ՌԴ արտգործնախարար Սերգեյ Լավրովի հայաստանյան այցի ժամանակ Գաբալայի խնդրին կից` անդրադարձ կատարվեց նաև Իրանի հարցին: Հայաստանը տարածաշրջանի միակ երկիրն է, որը լավ հարաբերություններ ունի Իրանի հետ և կարևոր դեր է խաղում Իրանի կողմից վտանգի գնահատման գործում: Միաժամանակ, ինչպես բոլորի, Հայաստանի համար ևս Իրանից վտանգ կա»,- նկատեց նա:
Անդրադառնալով հայ-թուրքական հարաբերությունների կարգավորման գործընթացին` Կիրակոսյանն ընդգծեց, որ բոլոր սպասելիքները Թուրքիայից են, որովհետև Հայաստանն արել է իրենից կախված ամեն բան:
