Մեծ Բրիտանիայում կյանքի 89-րդ տարում մահացել է ձեռնարկատեր և գյուտարար Ջիմ Մարշալը, որը ստեղծել է էլեկտրակիթառների համար աշխարհում հայտնի Marshall ուժեղացուցիչները:
Երիտասարդ տարիներին Մարշալը էլեկտրիկ էր աշխատում: Նա հետաքրքրված էր նաև երաժշտությամբ. երգում էր և թմբուկ նվագում: Ենթարդրվում է, որ առաջին ուժեղացուցիչը նա հենց իր համար է ստեղծել:
1960-ականներին Մարշալը դարձավ Լոնդոնում գտնվող երաժշտական գործիքների ոչ մեծ խանութի սեփականատեր: Հաճախորդները, որոնց շարքում կային ապագա հայտնի երաժիշտներ, հաճախ էին գանգատվում կիթառների համար որակյալ ուժեղացուցիչների բացակայությունից:
Դա պատճառ դարձավ, որ 40-ամյա Մարշալը սկսի քայլեր ձեռնարկել՝ Fender ընկերության ուժեղացուցիչների հիման վրա որակյալ մոդել ստեղծելու ուղղությամբ: Ուժեղացուցիչ ստեղծելու համար ֆինանսական միջոցներ էին պետք: Նա գումարն աշխատեց թմբկահարության մասնավոր դասեր տալով: 60-ականների վերջին արդեն նրա ստեղծած ուժեղացուցիչները կիրառում էին Ջիմի Հենդրիքսը, Deep Purple –ի Ռիչի Բլեքմորը, The Who-ի Փիթ Թաունշենդը և այլք:
Ի դեպ, Ջիմ Մարշալը ժամանակակից ռոք երաժշտության նախահայրերից մեկն է համարվում:
