Ընտրական խախտումների կանխարգելման ուղղությամբ արված հայտարարության տակ չորս կուսակցությունների ստորագրելը իրավապաշտպան Արթուր Սաքունցը համարում է քաղաքական կամքի դրսևորում։ «Առաջին լրատվական»-ի հետ զրույցում նա ասաց, որ եթե ստորագրել են նման հայտարարության տակ, ապա պիտի նաև գործեն. «Բավական չէ, որ միայն մահացած մարդկանց անունները հանեն ցուցակներից և հանձնեն ոստիկանությանը։ Արվում են նաև այլ ընտրական կեղծիքներ, որոնք նույնպես պիտի կանխարգելել»։
Իրավապաշտպանի կարծիքով՝ եթե ՀՀԿ-ն չի ստորագրել նման հայտարարության տակ, միանշանակ պետք է արձանագրել, որ կուսակցությունը չի պայքարում ընտրական կեղծիքների դեմ։ Նա նաև նշեց, որ եթե ԲՀԿ առաջնորդի փոխարեն հայտարարության տակ ստորագրած Վարդան Օսկանյանի քայլը չվավերացվի պաշտոնապես, կնշանակի՝ ԲՀԿ-ն պառակտված է ներսից և չի պատրաստվում դեմ դուրս գալ ընտրակեղծիքներին. «Համենայնդեպս, այն ծրագրերը, որոնք ես եմ ստանում ԲՀԿ կատարած գործունեության վերաբերյալ, ինձ հիմք է տալիս կասկածելու, թե արդյո՞ք ԲՀԿ-ն փորձում է պայքարել ընտրական խախտումների դեմ»։
Բոլոր դեպքերում Արթուր Սաքունցը քայլը համարեց դրական, քանի որ միավորվել են տարբեր կուսակցություններ՝ ընտրական կեղծիքների դեմ պայքարելու համար. «Անկախ քաղաքական տարաձայնություններից՝ այս կուսակցությունները ընտրական կեղծիքների դեմ տարվող պայքարի մասին նույն մոտեցումն ունեն, և կարևորն այն է, որ ՀՀ-ում ձևավորվում է այդ համակարգը»։
Հիշեցնենք, որ միասնական շտաբ ստեղծելու հայտարարությանը արձագանքել և ստորագրել են Դաշնակցությունը, «Ժառանգությունը», ՀԱԿ-ը և ԲՀԿ-ն։
