Ռուսական ВЗГЛЯД թերթի փոխանցմամբ՝ Վրաստանի փոխարտգործնախարար Նինո Կալանդաձեն երեկ հայտարարել է, որ Վրաստանը որևէ պաշտոնական շփում չի ունենալու գերմանացի հայտնի դիվանագետ Դիթեր Բոդենի հետ, որը ավելի վաղ երկրում գլխավորել է ԵԱՀԿ-ի և ՄԱԿ-ի առաքելությունները:
Նշվում է, որ Բոդենը շարունակում է եվրոպական տարբեր հիմնադրամների գծով փորձագետի կարգավիճակով այցելել Թբիլիսի: Նա այցելում է նաև Աբխազիա, որի խնդրով բավականաչափ զբաղվել է մի քանի տարի առաջ՝ կողմերին առաջարկելով համագործակցության բանաձևեր:
Այս կապակցությամբ Կալանդաձեն հայտարարել է. «Դիթեր Բոդենը հրապարակավ քննադատել է հակամարտությունների կարգավորման վերաբերյալ վրացական նախաձեռնությունները, որոնք համաձայնեցված են միջազգային գործընկերների հետ: Դիթեր Բոդենն օկուպացված տարածքների նկատմամբ Վրաստանի կառավարության ռազմավարությունը որակել է որպես պատրանքային:
Դիթեր Բոդենը հաճախ է խոսում Վրաստանի գործած սխալների մասին՝ դրանք համեմատելով Երրորդ ռեյխի հետ: Նա Վրաստանին կոչ է անում ներողություն խնդրել, ինչպես որ ժամանակին վարվել է նացիստական Գերմանիան: Այդպիսի դիրքորոշումն անընդունելի է վրացական կողմի համար: Վրաստանը Բոդենին չի արգելում այցելել երկիր, սակայն նրան չի ընդունելու պաշտոնական մակարդակով՝ պատվիրակությունների կազմում»:
Նշվում է, որ Բոդենը պլանավորել է Վրաստան այցելել այս շաբաթ: