Հունաստանի ոստիկանությունն Աթենքի Սինտագմա հրապարակում կիրառել է լուսաձայնային նռնակներ և արցունքաբեր գազ՝ ընդդեմ ցուցարարների, որոնք բողոքում են կառավարության վարած քաղաքականության դեմ, որի հետևանքով կրճատվել են աշխատավարձերը և թոշակները: Ցուցարարները ոստիկանների վրա քարեր և շշեր են նետել: Կարճ բախումից հետո կրքերը հանդարտվել են, և ցուցարարները կրկին վերադարձել են Անհայտ զինվորի հուշարձանի մոտ:
1,5 հազարանոց ցույցի առիթ է հանդիսացել 77-ամյա թոշակառուի ինքնասպանությունը՝ հենց այդ նույն հրապարակում: Թոշակառուն ասել է անցորդներին, որ չի կարողանում ապրել իր թոշակով, հետո հանել է ատրճանակը և կրակել իր գլխին: Այս ինքնասպանությունը վրդովեցրել է հասարակությանը, և շատ մարդիկ եկել են հրապարակ իրենց բողոքն արտահայտելու:
Ինչպես հայտնում են լրատվամիջոցները, թոշակառուի մարմնի վրա եղել է մի գրություն, ըստ որի` իր դժբախտության մեջ նա մեղադրում է կառավարությանը և ճգնաժամին:
Այս միջադեպին արձագանքել են նաև քաղաքական գործիչները: Վարչապետ Լուկաս Պապադիմոսը հայտարարել է, որ նման բարդ իրավիճակում պետությունն ու ժողովուրդը պետք է աջակցեն նրանց, ովքեր հուսահատության են հասել:
Կառավարության պաշտոնական ներկայացուցիչ Պանտելիս Կապսիսը միջադեպն անվանել է «մարդկային ողբերգություն» և բոլորին հանգստության կոչ է արել:
