Վաղը կառավարությունը նախատեսում է հաստատել Գյումրու տեխնոպարկի գործունեության 2012թ. ծրագիրը:
Նախատեսվում է իրականացնել մի շարք միջոցառումներ, մասնավորապես՝ Գյումրու տնտեսական զարգացման հիմնադրամի կառավարման նպատակով նախատեսվում է ներգրավել բարձր որակավորում ունեցող մասնագետների, որոնք, ուսումնասիրելով միջազգային հարուստ և հաջողված Տեխնոպարկերի գործունեության փորձը, այն կօգտագործեն Գյումրու զարգացման ենթակառույցների նախագծման և իրագործման նպատակով, իրականացնելու մի շարք կրթական ծրագրեր, Գյումրու տեղեկատվական տեխնոլոգիաների կենտրոնի հետ համատեղ կազմակերպելու պիլոտային ձեռներեցության և գործարար կառավարման հմտությունների զարգացման դասընթացներ:
Գյումրու տեխնոպարկի հայեցակարգը ենթադրում էր նաև ոսկեգործության, դիզայնի և նորաձևության կենտրոնի ստեղծում և դրանց շրջանակներում եռաչափ մոդելավորման առաջատար փորձի կիրառում: Այդ նպատակով ստեղծվել է Եռաչափ մոդելավորման լաբորատորիան:
2012թ. ծրագրի իրականացման համար բյուջեից հատկացվելու է 163 մլն դրամ:
Հիշեցնենք, որ Գյումրին տեխնոքաղաքի վերակառուցելու հավակնոտ ծրագրով ՀՀ կառավարությունը հանդես եկավ 2008թ.: Արդյունքում սկսվեց Գյումրու տեխնոպարկի ստեղծման ծրագրի իրականացում, որը հանդիսանում է Գյումրու Տեխնոքաղաքի հիմնական բաղադրիչներից մեկը:
