Ադրբեջանական Salam News գործակալության փոխանցմամբ՝ Իրանի գերագույն ղեկավար ու հոգևոր առաջնորդ, այաթոլլահ Ալի Խամենեին ռազմական ու հոգևոր ընտրանու ներկայացուցիչների հետ հանդիպման ժամանակ հայտարարել է, որ իրենց հասցեին հնչեցված բազմաթիվ սպառնալիքները վկայում են Իրանի հզորության մասին.
«Պետք է պահպանել և ամրապնդել բանակի մարտունակությունը: Երկրի զինված ուժերն ունեն ռազմական գործողություններ մղելու հարուստ փորձ, որը կուտակվել է 8-ամյա սրբազան պատերազմի ժամանակ (Իրանա-իրաքյան պատերազմ, 1980-1988 թթ): Իրանը կարողացավ դիմակայել Իրաքի հետ պատերազմում, որին աջակցում էին բազմաթիվ երկրներ, թե՛ Արևելքում, թե՛ Արևմուտքում:
«Ժողովրդավարության ջատագով» հանդիսացող արևմտյան երկրներն Սադամ Հուսեյնին անգամ տրամադրեցին զանգվածային ոչնչացման զենք (ԶՈԶ), որպեսզի դրանով իսկ ծնկի բերեն իրանական ժողովրդին: Իրանական բանակն օժտված է իր երկիրը պաշտպանելու վիթխարի փորձով: Երկրի պաշտպանության հարցում վիթխարի դեր ունի նաև հայրենասիրական ոգին»:
