ԱՄՆ-ը պատրաստ է Ղրղըզստանի ղեկավարության հետ քննարկել այդ երկրում իր ռազմաբազայի հեռանկարները: Այս մասին «Ազատություն» ռադիոկայանի ղրղըզական ծառայությանը հայտնել էՀարավային և Կենտրոնական Ասիայի երկրների հարցով ԱՄՆ պետքարտուղարի տեղակալ Ռոբերտ Բլեյքը:
Նա շնորհակալություն է հայտնել Ատամբաևին և նրա կառավարությանը ռազմաբազայի համար տարածք տրամադրելու համար և նշել, որ իրենք պատրաստ են քննարկել 2014 թ. հետո «Մանաս»-ի ճակատագիրը:
Բլեյքն ասել է, որ ԱՄՆ-ը հսկայական նշանակություն է տալիս Ղրղըզստանի կառավարության հետ հարաբերություններին ոչ միայն ժողովրդավարության բնագավառում նրա գրանցած առաջընթացի, այլև Աֆղանստանի կայունացմանն ուղղված նրա ջանքերի համար:
Նա նշել է, որ ռազմաբազան «նախատեսված չէ հարձակողական ռազմական գործողությունների համար՝ լինի դա Աֆղանստանի կամ որևէ այլ երկրի դեմ»:
Պաշտոնյայի խոսքերով՝ Վաշինգտոնը «խստորեն պահպանում է ռազմաբազայի պահպանման համար սահմանված պայմանավորվածությունները:
Ամերիկյան ավիաբազան Բիշքեկի «Մանաս» օդանավակայանում ստեղծվել է 2001 թ. դեկտեմբերին և Աֆղանստան բեռներ տեղափոխելու հիմնական տարանցիկ կետն է: Պաշտոնական տվյալներով՝ ռազմաբազայում տեղակայված է 1500 ամերիկացի զինծառայող և քաղաքացիական աշխատող: Ռազմաբազայի տեղակայման վերաբերյալ երկու երկրների միջև պայմանագրի ժամկետը լրանում է 2014 թ. աշնանը: Ղրղըզստանի նախագահը բազմիցս հայտարարել է, որ իրենք ոչ մի դեպքում չեն պատրաստվում երկարացնել ժամկետը:
