Վրացական «Կվելա Սիահլե» (Բոլոր նորություններ) թերթի փոխանցմամբ՝ Վրաստանի հակամարտությունների կարգավորման հարցերով նախկին պետնախարար Գեորգի Խաինդրավան հայտարարել է, որ եթե իշխանությունները հրաժարվեն քաղաքացիություն տրամադրել ընդդիմադիր միլիարդատեր Բիձինա Իվանիշվիլիին, ապա դա կառաջացնի քաղաքացիական զանգվածային բողոքներ.
«Այդ հարցում Վրաստանի իշխանությունների մերժումը կհանգեցնի նրան, որ իշխանությունները չեն հասնի աշնանը կայանալիք խորհրդարանական ընտրություններին: Ամերիկյան ինստիտուտի անցկացրած հարցախույզը ցույց է տվել, որ Վրաստանի քաղաքացիների 70 տոկոսը կողմ է արտահայտվել Իվանիշվիլիին Վրաստանի քաղաքացիություն շնորհելուն: Քաղաքացիության մերժման համար գոյություն չունեն իրավաբանական փաստարկներ»:
Հիշեցնենք, որ Վրաստանի նախագահ Միխեիլ Սաակաշվիլին Բիձինա Իվանիշվիլիին Վրաստանի քաղաքացիությունից զրկել է նախորդ տարվա հոկտեմբերի սկզբին՝ հիմնվելով այն բանի վրա, որ նա ունի նաև Ռուսաստանի և Ֆրանսիայի անձնագրեր: Իվանիշվիլին արդեն իսկ հրաժարվել է դրանցից և սպասում է վրացական անձնագրին: