Այսօր Հրանտ Դինքի ընկերները նորից հավաքվել էին «Ակոս» թերթի խմբգրատան դիմաց, որտեղ 4 տարի առաջ` հունվարի 19-ին, ժամը 15:00-ին, 17-ամյա Օգյուն Սամասթը սպանեց Հրանտ Դինքին:
Հավաքվածները պարզել էին «4 տարի` առանց արդարության», «4 տարի` առանց Խորհրդարանի», «Արդարություն` Հրանտի համար» պաստառները:
Դինքի կինը` Ռաքելը, մոտ չեկավ, սակայն ողջունեց բոլորին թերթի խմբագրատնից:
Շատերը խմբերով այստեղ էին եկել Շիշլի թաղամասից: Մի խումբը ղեկավարում էր դերասան Մեհմետ Ալաբորան: Այստեղ էին նաև տարբեր ժամանակներում Դինք ընտանիքի ճակատագրին արժանացած թուրք մտավորականների ընտանիքների անդամները:
Նյուխեթ Իփեքչին, որը 1979թ. սպանված Աբդի Իփեկչիի դուստրն է, իր խոսքում նշեց, որ իրենք չեն ցանկանում այլևս այսպիսի սպանություններ տեսնել. «Մեր ապագա սերունդները չպետք է ամաչեն: Մենք այս հանցագործությունները չպետք է ձևակերպենք որպես սպանություն: Մենք գիտենք, որ սրանք հանցագործություններ են մարդկության դեմ, թեպետ այս օրենքները նրանց այդպիսին չի դիտարկում: Մենք ցանկանում ենք իմանալ, թե ո՞վ է լույս սփռելու այս հանցագործությունների վրա: Մենք ուզում ենք իմանալ և տեսնել դա»,- ասել է Նյուխեթ Իփեքչին:
